"موز الأثرياء".. سعره أضعاف الأصفر ومطلوب عالميا.. هل حان الوقت لتوسع مصر في زراعة الموز الأحمر؟
الموز فاكهة أساسية في كل بيت تقريبًا رخيص، متوفر، والكل بيحبه.. بس مش كل موز زي بعضه.. في نوع نادر، لونه أحمر، سعره أضعاف الموز الأصفر، وبيتباع في العالم على إنه فاكهة فاخرة، اسمه الموز الأحمر.
السؤال بقى: ليه النوع ده مش منتشر؟ وليه سعره عالي؟ وهل مصر ممكن تزرعه وتكسب منه؟
الموز الأحمر يعتبر من أندر أنواع الموز في العالم، وعلشان كده إنتاجه محدود ومش متاح في كل الدول.. زراعته مركزة أساسًا في دول مناخها مداري، زي الهند، تايلاند، المكسيك، كولومبيا، جواتيمالا، والإكوادور.. وفي السنين الأخيرة بدأ يظهر بقوة في دول إفريقية زي كينيا وتنزانيا وأوغندا، لأن الجو هناك دافي، رطب، والتربة خصبة.
واللي يميز الموز الأحمر مش بس لونه المختلف، لكن كمان طعمه وقيمته الغذائية.. طعمه أحلى شوية من الموز الأصفر، وقوامه أنعم، وده مخليه مطلوب في مطاعم وفنادق فاخرة وأسواق غذاء صحي حول العالم.
واتكلمنا من الناحية الغذائية، الموز الأحمر غني جدًا بمضادات الأكسدة والبيتا كاروتين، وبيحتوي على نسبة عالية من البوتاسيوم.
فيه تقديرات بتقول إن ثمرة موز أحمر واحدة تعادل 3 ثمرات موز أصفر من حيث القيمة الغذائية، وده سبب رئيسي في ارتفاع سعره وزيادة الطلب عليه.
ومن ناحية الزراعة، شتلات الموز الأحمر مش صعبة، وبتنمو بسرعة، وبتتحمل ظروف مناخية مختلفة نسبيًا.. لكن المشكلة الحقيقية في التفاصيل. النبات ده حساس، وبيحتاج رطوبة عالية. وري منتظم ودقيق ومنع الإفراط في المياه علشان الجذور ما تتعفن وتسميد ومبيدات بحساب وأي خطأ صغير ممكن يقلل الإنتاجية بشكل كبير.
وهنا نيجي للسؤال المهم: ليه مش منتشر زي الموز الأصفر؟ السبب الأساسي إن إنتاجيته أقل، ودورة نموه أطول، وتكلفته أعلى.
المزارع في أغلب الدول بيفضل الموز الأصفر لأنه أسرع في الإنتاج وعائده مضمون وبيتحمل ظروف أصعب.. إنما الموز الأحمر محتاج صبر، وتكلفة، وتسويق مميز.
طيب هل مصر ممكن تدخل المجال ده؟ الحقيقة إن في تجارب محدودة جدًا اتعملت خلال السنين اللي فاتت، ضمن محاولات زراعة محاصيل استوائية جديدة.
المناخ المصري ممكن يساعد نسبيًا، خصوصًا في محافظات الصعيد، بسبب:ارتفاع درجات الحرارة وطول فترات سطوع الشمس.
لكن التوسع الكبير لسه قدامه تحديات واضحة زي ان الرطوبة في مصر أقل من اللي النبات محتاجه وتكاليف الري هتكون أعلى وطبعا الإنتاج أقل مقارنة بالموز العادي.
وده بيخلي العائد الاقتصادي غير مضمون بالنسبة لمزارعين كتير، خصوصًا إن مصر أصلًا من كبار منتجي الموز الأصفر، بحجم إنتاج بيقرب من مليون وربع مليون طن سنويًا.
يعني الموز الأحمر مش فاكهة عادية، ده محصول نخبوي… نجاحه محتاج تخطيط، مناطق محددة، وتوجيهه للتصدير أو السوق الفاخر.. ولو اتعمل صح ممكن يبقى ذهب أحمر جديد في الزراعة المصرية
