مصر هتكسب إيه من السماح للشركات الصينية في مصر بالتعامل المالي باليوان؟
يا ترى إيه القصة ورا إعلان مصر إنها هتسمح للشركات الصينية اللي شغالة عندنا بالتسجيل والتعامل المالي باليوان بدل الدولار، هل في نتايج مهمة من الخطوة دي، وليه القرار ده مهم جدا للاقتصاد المصري؟
في الأيام الأخيرة، الحكومة قالت إنها هتسمح للشركات الصينية إنها تتعامل باليوان بنسبة 100%، ودي خطوة هتخلي مناخ الاستثمار في مصر أسهل وأريح، خاصة في المنطقة الاقتصادية لقناة السويس، لأنها بتضم مجمعوعة كبيرة من مشروعات الشركات الصينية وبتعتبر بؤرة صناعية صينية على أرض مصر.
وفي الحقيقة، القرار ده هيشجع شركات صينية أكتر إنها تيجي وتستثمر فلوسها عندنا وتزود حجم استثماراتها، وبكده مصر هتكسب شراكات قوية مع الصين على المدى الطويل.
طيب ده هيفيدنا إحنا كمصريين في إيه؟
أول حاجة، هي إنه هيوفر لينا اليوان بكميات كبيرة، وده هيساعد على تقليل الضغط على الدولار، لإن مصر بتستورد من الصين حاجات كتير جدا، والأرقام بتقول إنها حوالي 13 مليار دولار من الواردات سنويا، فلما نتعامل باليوان بدل الدولار، هنوفر دولاراتنا ونسيب الجنيه يتنفس شوية.
ثاني حاجة، هي إن مع وجود حوالي 9 مليار دولار من الاستثمارات الصينية المتراكمة عندنا، دا هيدي ثقة للمستثمرين الصينيين الكبار إنهم يزودوا استثماراتهم ويفتحوا مشاريع جديدة زي مصانع وصناعات ومشروعات كتيرة.
تالت حاجة، هي إن كل ده بيخلي مصر نافذة الصين على إفريقيا والشرق الأوسط، ودي ميزة كبيرة لأنها هتزود فرصنا ومواردنا وتساعد على رفع معدلات النمو والدخل القومي.
أما بقى على المستوى الدولي، فالخطوة دي كمان هتقربنا من إن اليوان يبقى عملة عالمية على الساحة، لإن دايمل وجود مصر كشريك كبير هيدعم ده.
والخلاصة هي إن التهامل باليوان هيوفر علينا دولار، وهيقذر يريح الجنيه شوية، ويدي دفعة قوية للاقتصاد المصري، خاصة بعد اتفاقيات وشراكات بالمليارات بين مصر والصين وزيارات رسمية بتعزز التعاون ده.
وفي النهاية تقدر نقول، إن التوجه ده جزء من خطة كبيرة عشان الاقتصاد المصري يبقى أقوى، وأي انفتاح على شركاء جداد دايما بيخلق فرص أحسن وأمان أكبر لمستقبلنا.
