صناعات هتوفر مليارات الدولارات سنويا.. ازاي مصر قلبت الترابيزة
ايه حكاية مليارات الدولارات اللي مصر هتوفرها في القطاع الطبي. . وايه الصناعة المحرمة اللي مصر قدرت توطنها في مصر.. وازاي مصر دخلت نادي الكبار في الصناعات الحساسة..
مصر تعتزم إنشاء مصنع لأجهزة الأشعة الطبية باستثمارات 100 مليون دولار.. دا كان عنوان خبر في المواقع الإخبارية وقبلها كان فيه خبر تاني بيقول إن الدكتور مصطفى مدبولي، رئيس مجلس الوزراء تفقد مشروع إنشاء أول مصنع في أفريقيا والشرق الأوسط لتصنيع أجهزة الموجات فوق الصوتية (السونار) وأجهزة الرنين المغناطيسي بمدينة السادس من أكتوبر ودا في خطوة مهمة لتعزيز مكانة مصر كمركز إقليمي للتكنولوجيا الطبية.. الحقيقة الخبرين ناس كتير مش هياخد بالها منهم لكن في الحقيقة هما في غاية الأهمية ومصر مكانش بتحلم أنها تشوف اخبار زي دي.. تعال نقولك ليه.
تصنيع أجهزة السونار والأشعة الطبية المختلفة في مصر دا بتعتبر نقلة نوعية وقفزة صناعية في مصر لأن النوع دا من الصناعات كان حكر على الدول المتقدمة ومصر كانت بتستورد الأجهزة الطبية المختلفة بملايين الدولارات سنويا شوف بقى دفعنا فيها كام مليار دولار خلال عشرات السنين من الاستيراد ومكانش ممكن نقل التكنولوجيا دي الحقيقة للتصنيع في مصر لظروف كتير ..
معني إن حضرتك تصنع دلوقتي اجهزه طبية معقدة وكمان ممكن تصدر منها للخارج دا معناه إن مصر بقت في حتة تانية خالص وإن عصر التصنيع الحديث بدأ في مصر وتصنيع أجهزة السونار والأشعة دي مجرد أمثلة على فكرة لصناعات كتير معقدة تانية دخلت مصر زي صناعة الهواتف الذكية وكاوتش العربيات والعربيات الكهربائية وغيرها وغيرها..
معني انك تصنع اغلب المنتجات اللي بتشتريها انك باختصار بتوفر مليارات الدولارات سنويا من فاتورة الاستيراد وفي نفس الوقت بتقلب الحكاية من استيراد إلى اكتفاء ذاتي وبعدها تصدير عكسي يعني بدل ما كنت بتدفع بالدولار عشان تستورد دلوقتي هتقبض بالدولار من التصدير.. فرق كبير جدا بين الحالتين..ولو مشكلة الدولار اتحلت في مصر يبقي كل مشاكل مصر الاقتصادية والمالية اتحلت والاسعار هترجع تنزل تاني والجنيه هيسترد قوته.
تصنيع الأجهزة الطبية المتطورة بيدخلنا لصناعة تانية أوسع مصر ويتحقق فيها قفزات كبيرة جدا وهي صناعة الأدوية .. ولو حضرتك متعرفش.. نحب نقولك ان أكتر من 91% من الأدوية في السوق المصرية بيتم تصنيعها محليا وأن مصر حالياً الدولة الأولى في تصنيع الدواء بأفريقيا والشرق الأوسط ودا بحسب أرقام رسمية صادرة عن شركات عالمية.. وإن أن مصر هي الدولة الوحيدة اللي بتملك اكتر من 178 مصنع للدواء. ... وحابين نقول لحضراتك كمان إن صناعات الأدوية في مصر استقبلت استثمارات أجنبية ضخمة في الفترة الأخيرة وأنها هتكون حصان رابح في الاقتصاد المصري الفترة الجاية.
وكمان مصر بدأت تصنع خامات الأدوية الفعالة باستثمارات تتراوح مابين 150 إلى 200 مليون دولار، من خلال تحالف صناعي جديد.. وتصنيع المواد الفعالة في مصر كان صعب جدا قبل كده وكنت بنستورده لأن الشركات الأجنبية كانت بتعتبره سر حربي.
بالأرقام صادرات مصر الطبية حققت ارتفاع ملحوظ خلال 2024 وسجلت 811 مليون دولار بزيادة 23% مقارنة ب 2023 بحسب بيانات المجلس التصديري للصناعات الطبية في مصر.
كمان صادرات مصر من الصناعات الطبية والأدوية حققت خلال 5 أشهر من العام الحالي نمو بنسبة 33% وسجلت حوالي 370 مليون دولار، مقابل 278 مليون دولار لنفس الفترة من السنة اللي قبلها.، بحسب المجلس التصديري للصناعات الطبية.
