وداعًا للقلق المالي.. هتحل مشاكل حسابك البنكي من أي مكان
تخيل معايا كده أنت قاعد في بيتك، بتجهز كوباية الشاي بتاعتك، وبتقرر تفتح تطبيق البنك على موبايلك عشان تتأكد من رصيدك. فجأة، تلاقي رقم مختلف تمامًا عن اللي في بالك، أو عملية سحب أنت ما عملتهاش، أو الأسوأ من ده كله.. تلاقي الحساب صفر! أول فكرة هتخطر في بالك: "يا ترى إيه اللي حصل ده؟ وإزاي أتصرف دلوقتي؟
مشاكل الحسابات البنكية أنواع وأشكال، ومش كلها بنفس الخطورة. ممكن تكون المشكلة بسيطة زي إن بطاقة الصراف الآلي بتاعتك مش شغالة، أو إنك مش عارف تسحب فلوس من أي ماكينة. وممكن تكون المشكلة أكبر وأكثر تعقيدًا، زي إن تلاقي فلوس اتخصمت من حسابك من غير أي سبب واضح، أو تكتشف إن فيه حركة مالية غريبة حصلت على حسابك من غير علمك، أو حتى تلاقي حسابك اتجمد أو اتقفل فجأة.
مهما كان نوع المشكلة، كل بنك في مصر عنده أنظمة وإجراءات واضحة للتعامل مع المشاكل دي. لكن فيه خطوات أساسية وثابتة لازم تمشي عليها عشان تضمن إنك تحل مشكلتك صح، وترجعلك حقوقك كاملة. والنقطة المهمة اللي لازم تفهمها من الباية: لما تكتشف أي مشكلة، ما تتسرعش وتروح تجري على الفرع مباشرةً.. لأن في أغلب الأحيان ممكن المشكلة تتحل وأنت لسه قاعد مكانك، بمكالمة تليفون واحدة. إزاي؟ هقولك كل التفاصيل دلوقتي.
أول وأهم خطوة، وأنت لسه قاعد في بيتك، هي إنك تتصل بخدمة عملاء البنك بتاعك فورًا. كل بنك بيوفر رقم مخصص لخدمة العملاء عشان يستقبل الشكاوى والاستفسارات على مدار الساعة.
لو حسابك مثلاً في البنك الأهلي المصري، هتتصل بـ 19623. ولو حسابك في بنك مصر أو أي بنك خاص زي HSBC أو البنك التجاري الدولي CIB، هتلاقي الرقم المخصص لخدمة العملاء موجود بسهولة على الموقع الإلكتروني الرسمي للبنك، أو من خلال التطبيق البنكي على موبايلك.
لما تتصل.. مهم جدًا إنك تشرح المشكلة بتاعتك بوضوح وبشكل مباشر.. من غير ما تدخل في تفاصيل كتير ممكن تلخبط. يعني تقول: "فيه مبلغ معين اتخصم من حسابي بتاريخ كذا ومش عارف سبب الخصم ده إيه"، أو "بطاقتي البنكية وقفت فجأة ومش بتشتغل"، أو "الحساب بتاعي اتقفل أو اتجمد ومش فاهم ليه". في كتير من الأحيان، لو المشكلة بسيطة أو فنية، موظف خدمة العملاء بيقدر يحلها لك في دقايق معدودة على التليفون، وده بيوفر عليك وقت ومجهود كبير جدًا كنت ممكن تضيعه في المشاوير. لكن لو الموضوع كان محتاج مراجعة أو تحقيق أكبر، هنا بننتقل للخطوة الجاية
لو موظف خدمة العملاء ما قدرش يحل المشكلة بتاعتك من خلال التليفون أو طلب منك بشكل واضح إنك لازم تروح الفرع عشان يحلوا المشكلة، هنا لازم تتحرك بنفسك وتزور أقرب فرع ليك.
بس قبل ما تروح، اتأكد الأول من مكان أقرب فرع ليك ومن مواعيد عمله الرسمية. تقدر تستخدم تطبيق البنك بتاعك على الموبايل، أو الموقع الإلكتروني، وتكتب عنوانك، وهيظهر لك كل الفروع اللي قريبة منك على الخريطة.
ولما تقرر تروح الفرع لازم تاخد معاك بطاقتك الشخصية، وأي مستندات أو أوراق معاك ممكن تثبت المشكلة أو تدعم موقفك. يعني مثلاً، لو المشكلة في خصم مبلغ معين، خد معاك كشف حساب بنكي بيوضح المعاملة دي. لو عندك صورة للشاشة من تطبيق البنك بتوضح المشكلة، خدها معاك. المستندات دي بتساعد الموظف المختص في الفرع إنه يفهم المشكلة أسرع ويلاقي الحل المناسب.
لما توصل الفرع اشرح للموظف المختص اللي حصل معاك بالتفصيل. ولو حسيت إن الموظف اللي قدامك مش عارف يتصرف أو محتاج مساعدة من حد أعلى، اطلب فورًا إنك تكلم مدير الفرع مباشرةً الموضوع ده مش هزار، دي فلوسك وحقوقك، ومن حقك إنك توصل للمسؤول اللي يقدر يحل المشكلة دي بشكل كامل.
