استثمارات بالملايين في الصعيد.. شوف مميزات افتتاح مصنع كباسات التبريد
النهاردة الفريق كامل الوزير، نائب رئيس الوزراء للتنمية الصناعية ووزير الصناعة والنقل، افتتح أول مصنع من نوعه في مصر والشرق الأوسط لتصنيع كباسات أجهزة التبريد، أو زي ما بنسميها "الكومبريسور"، وده بيعتبر نقلة نوعية في التصنيع المحلي، لأن في استثمارات جديدة وفرص شغل.
والمصنع ده تابع لشركة الرضوان الدولية للصناعات الهندسية، ومقام على مساحة 5000 متر مربع، باستثمارات وصلت ل 5 مليون دولار، طيب ليه المصنع ده مهم؟
بص يا سيدي، أولا ده أول مصنع من نوعه في المنطقة، يعني لأول مرة، مصر بتدخل مجال تصنيع الكباسات بشكل محلي بدل ما كانت بتعتمد على الاستيراد بنسبة 100%، ثانيا نسبة المكون المحلي وصلت ل 40%، وبيشتغلوا على زيادتها ل 70%،
وده معناه تصنيع أكتر بأيد مصرية وتقليل الاعتماد على الاستيراد، وكمان تقوية الصناعة الوطنية.
وثالثا بقى، ده مش بس للسوق المحلي، ده منتجاته هتدخل أسواق كبيرة زي تركيازوالسعودية، والإمارات ولبنان والسودان وليبيا واليمن.
برضو، المصنع بيوفر فرص شغل في قلب الصعيد، لأن مشروع زي ده مش بس استثمار، ده كمان تنمية حقيقية، بيوفر وظايق وفرص تدريب في سوهاج، وبيغير شكل المناطق الصناعية زي غرب طهطا وجرجا.
كمان، المصنع ده بيعكس الدعم الكامل من الحكومة للصناعة المحلية، خاصة وإن الوزير تابع بنفسه كل تفاصيل خطوط الإنتاج، من التجميع للاختبار والتغليف، ووجه بسرعة الانتهاء من البنية التحتية للمنطقة الصناعية قبل أغسطس 2025، علشان تطرح أراضي جديدة للاستثمار.
يعني باختصار، ده مش مجرد مصنع، ده خطوة في طريق تصنيع مصري حقيقي بسواعد محلية وبنظرة تصديرية عالمية، يعني دليل قوي على إن الحكومة بتوطن الصناعات داخل مصر وهتوفر تكاليف استيرادها بالعملة الصعبة، وكمان بيعتبر إنجاز جديد من ضمن الإنجازات اللي بتحصل في الجمهورية الجديدة.
وقريب جدا هنلاقي مصانع كتيرة بيتم افتتاحها داخل مصر لصناعات بيحتاجها المواطن والمزارع والصناع وكمان الصناعية في قصة بترسم إنجاز عظيم ونجاح أعظم للجمهورية الجديدة.
