فتح عينيك واتأكد من كل خطوة.. إزاي إعلان على فيس بوك ممكن يخرب بيتك

قولى كده .. هتعمل ايه لو  شفت إعلان على فيسبوك بموبايل بنص السعر.. هتدوس على اللينك عشان تشتريه ولا هتفكر الأول؟ طب تعرف ان اللينك ده ممكن يكون سبب انك تخسر كل فلوسك؟ طب تعمل ايه عشان تعرف العروض الوهمية من العروض الحقيقية؟

في مواسم الخصومات زي رأس السنة والأعياد.. النصابين بيستغلوا إنك عايز تشتري حاجات بسعر رخيص.. بيرموا إعلانات على السوشيال ميديا بمنتجات زي موبايلات أو لاب توبات أو حتى ملابس بسعر مغري جدًا.. بس في الحقيقة مفيش منتج أصلًا.. الإعلان بيبقى فخ عشان يسرقوا بيانات كارتك ويستخدموها يشتروا بيها حاجات غالية أو يحولوا فلوسك لحساباتهم.

من الثراء إلى السجون.. قصص أكبر عمليات الاحتيال المالي في التاريخ

أبرز أساليب الاحتيال البنكي | إنفوجراف

فلو عايز تحمي نفسك.. لازم تعرف إزاي الناس دي بتشتغل.

النصابين بيعملوا إعلانات مبهرة على فيسبوك، إنستجرام، أو حتى جروبات واتساب.. مثلاً موبايل سعره 20 ألف بيبقى بـ 5 آلاف.. الإعلان فيه لينك بيطلب منك تدخل عليه عشان تكمل الشراء.. اللينك ده بيوديك لموقع شكله زي المواقع الحقيقية بس هو مزيف تمامًا.

الموقع بيطلب منك تدخل بيانات الكارت بتاعك.. زي رقم الكارت، تاريخ الانتهاء، والكود السري ..و لما تدخل البيانات دي بتروح للنصاب على طبق من دهب. بعدها بيستخدموا بياناتك يشتروا حاجات غالية زي إلكترونيات أو يحولوا الفلوس لحسابات تانية في ثواني.

فلو عايز تحمي فلوسك.. لازم تبقى حذر.. أول حاجة ما تثقش في أي عرض مغري زيادة عن اللزوم.. لو السعر خيالي.. زي موبايل بنص سعره..  ده أول إشارة إن فيه حاجة غلط. السوق مش هيرمي فلوسه كده.

تاني حاجة، لو دخلت على لينك من إعلان بص كويس على عنوان الموقع. المواقع الحقيقية بتبقى بأسماء معروفة زي “سوق دوت كوم” أو امازون  مش حاجة غريبة.

تالت حاجة.. ما تدخلش بيانات الكارت بتاعك على أي موقع إلا لو متأكد 100% إنه موثوق.

رابع حاجة..اشتري من مصادر معروفة بس.. زي المتاجر الرسمية أو المواقع الكبيرة اللي الكل بيتعامل معاها..و لو الإعلان طلب منك تحول فلوس على حساب بنكي أو تدفع بطريقة غريبة ارفض على طول.

ولو وقعت في الفخ ودخلت بياناتك.. لازم تتصرف بسرعة.. كلم البنك بتاعك فورًا وأبلغهم إن الكارت بتاعك اتسرق بياناته.. و لو بلغت في نفس اللحظة، ممكن يقدروا يوقفوا أي عمليات مشبوهة.

وخليك فاكر دايما..  إعلان واحد ممكن يكلفك فلوسك كلها لو ما أخدتش بالك… النصابين بيستغلوا حماسك في الخصومات.. عشان كده لازم تفتح  عينيك وتتأكد من كل خطوة عشان تمي فلوسك.