بعد أنبوبة البوتاجاز.. شوف اللي هيحصل في أسعار الغاز المنزلي

الدولة اخذت قرار بزيادة اسعار اسطوانات الغاز، وطبعا القرار ده هيكون وراه قرارات تانية هتسبب في زيادة معاناة المواطنين.. يا تري اية اللي جاي بعد قرار زيادة اسعار اسطوانات البوتاجاز..  وايه مصير اسعار غاز المنازل.. والدولة هتوفر كام من زيادة اسعار اسطوانات الغاز.. خليكم معانا للآخر وهتعرفوا التفاصيل

الحكومة قررت في مفاجأة شديدة زيادة اسعار اسطوانات البوتاجاز بنسبة 50%، وارتفع سعر الاسطوانة في المصنع من 100 الي 150 جنيه وسعر اسطوانة الغاز التجاري من 150 الي 200 جنيه، ودي تعتبر اكبر زيادة الحكومة أقرتها في اسعار المحروقات بشكل عام وتاريخ اسطوانات البوتاجاز بشكل خاص .

طيب ايه اللي جاي بعد قرار زيادة اسعار اسطوانات البوتجاز؟.
في الفترة اللي جاية في قرارات كتير هتتاخذ وهتكون لها اعباء اقتصادية اضافية علي المواطن المصري واحد من القرارات دي هيكون وراها قرارات تانية واحدة من القرارات دي هيكون زيادة أسعار الغاز الطبيعي للمنازل والمصانع، خصوصا أن الحكومة كانت واخذة قرار بتثبيت أسعار الغاز الطبيعي لصالح القطاع المنزلي والصناعي دون أن تغير في الفترات اللي فاتت، وده كان بهدف الحفاظ على الأسواق وعدم تأثر بعض المنتجات اللي بتنتجها المنشآت الصناعية اللي شغالة بالغاز الطبيعي، وخطة وزارة البترول لرفع الدعم عن المواد البترولية  ممكن تدفع الوزارة لرفع أسعار الغاز الطبيعي للمنازل والمصانع في الفترة الجاية وخاصة أنه طلعت تسريبات من قريب حولين نية الحكومة رفع أسعار غاز المصانع بنسبة 32 في المية.

مصادر بوزارة البترول والثروة المعدنية قالت أن في دراسة اعدت داخل الوزارة وأوصت بضرورة وجود زيادة طفيفة علي شرائح الغاز الطبيعي والزيادة دي هتترواح من 10% غلي 15% في اسعار الشرائح المنزلية عشان المواطن مايتحملش أعباء فوق اللي هو عايش فيها.

طيب اسعار شرائح الغاز المنزلي والتجاري بيوصل سعرها لكام دلوقتي قبل تطبيق الزيادة الجديدة؟.
أسعار الغاز الطبيعي في مصر بتختلف من القطاع المنزلي والقطاع الصناعي والتجاري، وبتتراوح أسعار الغاز للقطاع المنزلي بين 2.50 جنيه و3.75 جنيه لكل متر مكعب، وبتكون حسب حجم الاستهلاك، وأسعار الغاز للقطاع الصناعي بتحدد بناءً على نوع النشاط، وبتوصل تبلغ تكلفة الغاز للصناعات زي الحديد والصلب لـ 5.75 دولار لكل مليون وحدة حرارية بريطانية، وبتوصل تكلفة الغاز لصناعة الأسمنت 12 دولار ووتوصل التكلفة لتوليد الكهرباء لـ 3 دولار .
طيب الدولة هتوفر كام من الزيادة الجديدة في اسعار اسطوانات الغاز؟.
وزارة البترول والثروة المعدنية قالت إن الحكومة بتستهدف تحقيق توفير من زيادة أسعار أسطوانات البوتاجاز بيتراوح من 12 إلي 14 مليار جنيه في العام المالي الحالي .
الوزارة اتكلمت كمان عن اسباب الزيادة الجديدة في اسعار اسطوانات الغاز وقالت إن السبب في الزيادة دي هيا قرارات الحطومة بالتعاون مع صندوق النقد الدولي لرفع الدعم على المواد البترولية، خصوصا أن الدولة بتتحمل فلوس كتيرة جدا لتلبية احتياجات السوق المحلي من المواد البترولية، وخطة الدولة لرفع الدعم عن المواد البترولية هتستمر لحد السنة اللي جاية خصوصا أن مخصصات دعم المواد البترولية في الموازنة الحالية للدولة وصلت لـ154.5مليار جنيه لدعم المواد البترولية.