مفاجأة سارة من الحكومة لملايين الموظفين خلال أيام.. إيه الحكاية؟
إيه هي المفاجأة السارة اللي بتجهزها الحكومة لملايين الموظفين خلال أيام، هل متعلقة بالمرتبات أو الحوافز، ولا ترقيات، ولا قرار تاني بره الصندوق.. هنقولك كل التفاصيل فتابعنا للآخر.
في الساعات الأخيرة، الحكومة أعلنت عن خبر سعيد للموظفين وهتبدأ تنفذه الشهر ده، والقرار ده متعلق بالمرتبات.. طب إيه اللي هيحصل؟
بص يا سيدي، الحكومة ممثلة في وزارة المالية، قالت أنه هيتم تبكير ميعاد صرف مرتبات شهر سبتمبر 2024 لملايين الموظفين، يعني حضرتك لو موظف فهتقبض بدري الشهر ده، 5 أيام.
وطبعا السبب هو دخول المدارس، وكتير من أولياء الأمور بيبقوا محتاجين يشتروا مستلزمات المدارس لأولادهم زي اللبس والشنط واللانش بوكس والكتب المدرسية وكمان كتب ومصاريف الدروس.
وعشان كده، الحكومة قررت صرف المرتبات للموظفين بالقطاع الحكومي في 66 وزارة وهيئة حكومية بداية من يوم 22 سبتمبر 2024 وده بدل يوم 27، وهيستمر الصرف لمدة 5 أيام.
ووزارة المالية قالت، إنها هتبدأ يوم الأحد الموافق 22 سبتمبر في صرف المرتبات، وهتستمر في عمليات الصرف خلال أيام 22 و23و 24 و25 و26 سبتمبر، لكن المتأخرات هيتم صرفها خلال أيام 8، 9، 10 سبتمبر.
طب جدول مواعيد صرف مرتبات سبتمبر، هيكون إزاي؟
بص يا سيدي، لو حضرتك شغال في مجلس النواب ومجلس الأمن القومي والجهاز المركزي المحاسبات ومجلس حقوق الإنسان و المجلس الأعلى للصحافة والمجلس الأعلى للإعلان، وكمان وزارة التموين والقوى العاملة والإسكان التضامن والطرق والنقل، فهتقبض يوم الأحد 22 سبتمبر.
أما يوم 23 سبتمبر، فهيكون مخصص لقبض الموظفين في وزارات التعليم العالي، التنمية المحلية، العدل، الكهرباء، التخطيط، الاستثمار، التعاون الدولي، التربية والتعليم، الزراعة، الخارجية، الشباب والرياضة، والمالية، المحكمة الدستورية العليا، الأزهر، دار الإفتاء المصرية، هيئة النيابة الإدارية، الجهاز المركزي للتنظيم والإدارة، هيئة قضايا الدولة، مجلس الوزراء، النيابة العامة، اللجنة العليا للانتخابات.
ولو عايز تعرف هتقبض منين، فحضرتك ممكن تقبض من ماكينات ال Atm واللي عددها بيوصل ل 25 ألف ماكينة، كمان من خلال مكاتب البريد.
وفي النهاية، هنقولك مرتبك بعد الزيادة الأخيرة، هيوصل كام.
6000 جنيه للدرجة السادسة.
6250 جنيه للدرجة الخامسة.
6500 جنيه للدرجة الرابعة.
6750 جنيه للدرجة الثالثة.
7 آلاف جنيه للدرجة الثانية.
7500 جنيه للدرجة الأولى.
9000 جنيه لدرجة مدير عام.
10000 جنيه للدرجة العالية.
12000 جنيه للدرجة الممتازة.
