الدولار يعلى براحته.. أسعار السلع الأساسية ثابتة في المنافذ الحكومية

الدولار يعلى.. طب أسعار الأكل هتعمل إيه؟ وسط ارتفاع الدولار والضغوط اللي بتواجه الأسواق، الحكومة بتقول إن أسعار السلع الأساسية مش هتتأثر بارتفاع العملة الأمريكية على المدى القصير، على الأقل في المنافذ الحكومية

وزير التموين شريف فاروق أعلن إن أسعار السلع الأساسية هتفضل مستقرة في 284 منفذ حكومي لمدة 6 شهور، وإن الدولة هتتحمل فرق السعر علشان توفر السلع للمواطنين بأسعار مخفضة مقارنة بالسوق.

والمنافذ دي بتوفر 30 سلعة أساسية، من بينها السكر والزيت والأرز والمكرونة والدقيق والبقوليات، ضمن مبادرة هدفها تخفيف الضغط على المواطنين ومواجهة ارتفاع تكاليف المعيشة.

لكن الحكاية مش أسعار وبس.. الحكومة كمان بتتحرك لتأمين المخزون الاستراتيجي من السلع الغذائية، وبتتابع توافر المنتجات الأساسية والأدوية والأسمدة، وسط اضطرابات الأسواق العالمية وارتفاع تكاليف الشحن والنقل.

والسؤال هنا: هل استقرار الأسعار في المنافذ الحكومية هيقدر يخفف فعلًا من تأثير ارتفاع الدولار على ميزانية الأسر المصرية؟ خصوصًا إن الأسعار في باقي الأسواق ممكن تتأثر بتكلفة الاستيراد والخامات والإنتاج.

المبادرة مستمرة لمدة 6 شهور، والتحدي الحقيقي هو استمرار توافر السلع بالكميات المطلوبة والحفاظ على أسعارها المخفضة طول الفترة دي.