لغز الدولار في مصر.. 57 مليار دولار احتياطي وموجة خروج للأموال الساخنة
يا ترى ليه الدولاررجع يطلع ويسجل مستويات قياسية رغم إن احتياطي النقد الأجنبي في مصر بيحقق أرقام غير مسبوقة؟.. وإزاي مليارات الدولارات بتدخل الاقتصاد من تحويلات المصريين والسياحة والصادرات وفي نفس الوقت فيه استثمارات أجنبية بتخرج بالمليارات؟.. وهل خروج الأموال الساخنة ممكن يزود الضغوط على الجنيه خلال الفترة الجاية؟
الحكاية بدأت مع عودة الدولار للارتفاع فوق مستوى 56 جنيه في البنوك المصرية.. ووصل أعلى سعر للبيع إلى 56.35 جنيه في بنك أبوظبي الإسلامي وبنك سايب.. بينما سجل في البنك المركزي 56.20 جنيه للبيع.
ومن أهم العوامل اللي الأسواق بتراقبها حاليا حركة الأموال الساخنة.. وهي استثمارات أجنبية بتدخل أدوات الدين الحكومية للاستفادة من العائد وبتقدر تخرج بسرعة لما الظروف تتغير.
وخلال الأسبوع الماضي سجل المستثمرون العرب والأجانب صافي بيع بقيمة 1.9 مليار دولار من أدوات الدين المصرية.. واستمرت التدفقات الخارجة يوم الاثنين بنحو 663 مليون دولار ويوم الثلاثاء بنحو 619 مليون دولار.
لكن في المقابل فيه مؤشرات إيجابية مهمة.. احتياطي النقد الأجنبي ارتفع إلى مستوى قياسي بلغ 57.35 مليار دولار في سبتمبر.. وتحويلات المصريين بالخارج قفزت بنسبة 27.2% خلال أول 8 شهور من 2026 لتسجل 33.9 مليار دولار.
كمان التحويلات وصلت إلى 47.3 مليار دولار خلال العام المالي 2025-2026.. وده بيوفر مصدر مهم للعملة الصعبة للاقتصاد المصري.
وهنا لازم نفرق بين الاحتياطي وتدفقات الدولار اليومية.. لأن ارتفاع الاحتياطي مش معناه بالضرورة إن سعر الصرف هيتراجع فورا.. خصوصا مع اختلاف توقيتات دخول وخروج الأموال وحجم الطلب على العملة الأجنبية.
وبالتالي التحدي الحقيقي هو استمرار جذب الدولار من مصادر مستدامة زي التصدير والسياحة وتحويلات المصريين والاستثمار المباشر.. مع تقليل الاعتماد على الأموال الساخنة اللي ممكن تتحرك بسرعة.
