100 كم/ساعة و20 محطة.. مترو الإسكندرية الجديد يقلب المواصلات ومرحلتان في الطريق
الإسكندرية على موعد مع نقلة كبيرة في المواصلات.. مترو جديد بسرعة 100 كيلومتر في الساعة، و20 محطة في المرحلة الأولى، واللي جاي ممكن يغيّر شكل التنقل في المدينة بالكامل.
المشروع بيربط محطة مصر في وسط الإسكندرية بمحطة أبو قير، على طول 22 كيلومتر، والمستهدف إنه يقلل زمن الرحلة من 50 دقيقة لـ25 دقيقة بس، وكمان يقلل زمن انتظار القطارات من 10 دقايق لدقيقتين ونص.
لكن المفاجأة إن المشروع مش هيقف عند أبو قير.. فيه مرحلتين تانيين لسه قيد الدراسة، الأولى هتمتد لحد الكيلو 21 في العجمي بطول 31 كيلومتر، والتالتة هتوصل لحد مطار برج العرب بطول 48 كيلومتر.
يعني إحنا بنتكلم عن شبكة مترو مستهدف توصل لـ108 كيلومترات، وتربط مناطق أكتر في الإسكندرية، مع وسائل النقل التانية زي القطار والترام.
والمخطط كمان إن الطاقة الاستيعابية توصل لـ60 ألف راكب في الساعة لكل اتجاه، بدلًا من حوالي 2850 راكب حاليًا.
السؤال بقى: هل مترو الإسكندرية هيكون الحل اللي يخفف زحمة الشوارع ويوفر وقت المشاوير فعلًا؟ ده اللي هيتحدد مع تقدم التنفيذ ودخول المشروع الخدمة.
