مفاجأة تقلب موازين سوق الغاز.. مصر راجعة عملاق تاني

 
مصر هترجع تاني تصدر الغاز وعندها اكتشافات صخمة في الطريق.. ايه اللي حصل في الساعات الأخيرة في ملف التنقيب عن البترول والغاز الطبيعي وازاي مصر هترجع ملكة السوق في  المنطقة.. خليكم معانا في التقرير  ده للآخر وهنعرف التفاصيل..
 
معروف إن مصر بعد اكتشاف حقل ظهر بدأت تحقق الاكتفاء الذاتي من الغاز للمنازل والمصانع وكمان قدرت تصدر للخارج من انتاجها وكمان بقت تعيد تصدير الغاز من حقول الدول التانية في حوض البحر المتوسط ودا بسبب الإمكانيات المصرية  الضخمة بمجال محطات إسالة الغاز وإعادة تصديره وطبعا دا كان بمقابل كويس جدا لغاية ما حصلت أزمات في سنة 2023 منها انخفاض انتاج الحقل وتأثر عمليات التنقيب واللي اتأثرت بأزمة نقص الدولار وارتفاع أسعاره في السوق السودا وتعدد أسعار الصرف ودا عمل ربكة كبيرة في مجال التنقيب والاستثمار الأجنبي بشكل عام ودا غير أن شركات البترول العالمية في مصر كان ليها مستحقات متأخرة ودا أثر بشكل كبير على الإنتاج وضخ استثمارات جديدة في تطوير مواقع حقول الغاز والبترول.
واللي حصل بعد تعويم الجنيه إن الدولة بدأت تصرف مستحقات الشركات العالمية واللي بدأت فعلا تضخ أموال جدة في التنقيب وتنمية الحقول الحالية وحفر حقول جديدة زي ما حصل كده في منطقة امتياز حقل ظهر بعد عودة شركة ايني الإيطالية للتنقيب في المنطقة وأخيرا قرارها بتنمية حقل ظهر القديم.. كل دا كويس جدا  لكن ايه الجديد في ملف التنقيب عن البترول والغاز ؟
لو متابعين هنلاقي إن مصر دلوقتي بتنفذ اكبر خطة في تاريخها للتنقيب عن البترول والغاز والبشاير ممتازة ولسه من ساعات عرفنا أنه فيه شركات مصرية قدرت تحفر بنجاح 23 بير بترول وغاز والبشاير مفرحة ودا غير عشرات المناطق التانية اللي الشركات العالمية بتنقب فيها دلوقتي في خليج السويس والدلتا وشواطئ المتوسط وفيه حالة تفاؤل كبيرة بين الشركات دي بخصوص الاحتياطيات الكبيرة من الغاز والبترول.

الخبر المفرح بقي إن شركة شل، وهي من الشركات العالمية اللي بتساهم في محطة إدكو المصرية لتصدير الغاز المسال، اعلنت عودة التصدير من المحطة بحلول الربع الأخير من العام الجاري، ودا بعد توقف لعدة أشه ومعروف أن ادكو هي واحدة من اهم منشأتين لتصدير الغاز الطبيعي المسال في مصر، والتانية دمياط للغاز الطبيعي المسال والاتنين مملوكين للشركة المصرية القابضة للغازات الطبيعية "إيجاس"، وإيني الإيطالية.

ولسه فيه اخبار تانية سارة في ملف التنقيب عن البترول والغاز وهي اللي أعلنتها وزارة البترول والثروة المعدنية، أن فيه شركات اماراتية أبدت اهتمامها بالمشاركة في مناقصة التنقيب عن الغاز الطبيعي اللي طرحتها مؤخرا، الشركة المصرية القابضة للغازات الطبيعية إيجاس في 12 منطقة عبر بوابة مصر الرقمية للاستكشاف والإنتاج ومن بين الشركات دي بقي  شركة مبادلة الإماراتية للطاقة ودي من. أكبر شركات التنقيب في المنطقة وبتوصل قيمتها التسويقية لأكتر من 30 مليار دولار وعندها مشاريع في أنحاء العالم واستثمارات بالمليارات يعني شركة عالمية..
المهم الشيخ منصور محمد آل حامد الرئيس التنفيذي لشركة مبادلة الإماراتية وصل مصر ومعاه وفق رفيع المستوى واجتمع مع المهندس كريم بدوي وزير البترول والثروة المعدنية ودا كان لقاء مهم جدا بخصوص الإستثمارات الإماراتية في صناعة الطاقة والبترول والغاز واللي بتمثل أحد أهم رموز التعاون والعلاقات المتميزة بين البلدين الشقيقين، والوزير المصري رحب بمساهمة الشركة الإماراتية في قطاع البترول والتعدين وزيادة الاستثمارات الإماراتية في ظل الجهود الجارية لإتاحة فرص استثمارية جديدة.
وعلى فكرة شركة مبادلة الإماراتية ليها استثمارات في مجال البحث والاستكشاف للغاز الطبيعي في مصر من خلال مشاركتها في مناطق مهمة بالبحر المتوسط ومنها منطقة امتياز حقل ظهر بنسبة 10٪ ومنطقة امتياز حقل نور بنسبة 20 ٪، علاوة على قطاع رقم 4 بالبحر الاحمر بنسبة 27٪.
الشيخ منصور آل حامد الرئيس التنفيذي لمبادلة للطاقة صرح وقال إن فيه فرص واعدة في قطاع الطاقة في مصر وإن شراكة مبادلة بتشارك في أنشطة البحث عن الغاز وإنتاجه في مصر مع عدد من الشركات العالمية ودي قاعدة للتوسع في مناطق تانية وإن الحوار والتواصل مفتوح للوصول إلى أفكار جديدة للتعاون وتوسيع نطاق البحث والتنقيب عن البترول والغاز في مصر.