لو بتسأل عن الدهب.. أعرف المعدن الأصفر رايح على فين الأيام اللي جايه

 
الدهب بقي ملهوش كبير خلاص وتقدر تقول كده ركب الصاروخ وهيطلع فوق السحاب ودا باختصار عشان الأيام والشهور الجاية هي زمن الدهب وهيكون عصره الزاهي كمان.. فلو عاوز تستثمر صح.. شوف الفيديو للآخر وهتعرفوا التفاصيل 
 

 
أي حد معاه فلوس زيادة دلوقتي أو مدخرات وعاوز يستثمرها في حاجة مفيدة تجيب فلوس بيبقى محتار يشغلها في ايه دهب ولا عقار ولا بورصة ولا شهادات الادخار ولا يحطها في مشروع ويريح دماغه والحقيقة كل دي استثمارات كويسة وبتحمي فلوسك وبتزودها كمان لأن فلوسك لو سبتها كده تحت البلاطة فتأكد أنها بتخسر بمرور الوقت والزمن بياكلها..
طيب تستثمر فلوسك فين ؟
عشان نجاوب على السؤال دا لازم الأول نقولك على ميزة وعيوب كل نوع من الاستثمارات عشان الصورة تبقي واضحة قدام حضرتك.. أول حاجة العقار ودا بقي دلوقتي مغامرة بسبب توقع خبراء السوق لحدوث فقاعة عقارية بمعنى كله بيشتري عقارات وشقق بغرض الاستثمار والبيع مش عشان الاسكان والسوق بياخد منحنى صعود لغاية ما يوصل لنقطة الذروة وبعدين الأسعار تنزل بشكل كبير جدا مع عمليات البيع الجماعي إلا إذا كنت هتشتري عقار ونسيبه فترة كبيرة لغاية ما تشوف السوق رايح على فين.

أما بخصوص الاستثمار في البورصة فالنوع دا بالذات من الاستثمار محتاج خبرة كبيرة وتخصص عشان كده بيكون عن طريق شركات مالية متخصصة هي اللي بتشتريلك أسهم في الشركات الرابحة ومشكلة النوع دا أن فلوسك مش بتكون تحت ايدك وغير انك طول الوقت حاطط ايدك على قلبك وانت بتابع حركة الأسهم بتاعتك.
أما بخصوص الاستثمار في شهادات الادخار فالنوع ده من الاستثمارات ميزته أنه استثمار آمن ومضمون وانك بتاخد فايدة معروفة لمدة معينة وبتغنيك عن المشاوير ومتابعة أموالك أو القلق عليها لأنها مضمونة من البنك المركزي المصري ولو انت موظف مثلا فالاستثمار في شهادات الادخار ميزة كبيرة جدا لانه مش هيشغلك أو ياخد وقتك.
نيجي بقي للاستثمار في المشروعات الخاصة ودا استثمار مهم جدا ومن افضل الاستثمارات لكن محتاج وقت ومتابعة للمشروع عشان ينجح وتكسب منه يعني هتفرغ وقتك كله أو معظمه لمتابعته وميزته كمان انك ممكن تحقق منه مكاسب كبيرة وفلوسك تحت ايدك لكن لو مش بتفهم في النشاط اللي شغلت فلوسك فبه هتبقى مشكلة كبيرة.
ونروح بقي للاستثمار في الدهب ودا من أهم الاستثمارات اللي ممكن تحط فيها فلوسك الزائدة أو مدخراتك لأن كل توقعات الخبراء والمؤسسات المالية الدولية بتقول إن أسعار الدهب هتفضل تزيد لغاية اخر 2026 والاسعار هتوصل لارقام قياسية ودا اللي بيحصل دلوقتي مع الزيادات الكبيرة في الأسعار وحسب أحدث توقعات اونصة الدهب هتوصل 2700 دولار في منتصف 2025 واكتر من 3000 دولار في 2026 ودا معناه قفزة كبيرة في أسعار الدهب في مصر لان السوق عندنا مرتبط بالسوق العالمي وفيه توقعات بتقول إن سعر جرام 24 هيوصل 7 آلاف جنيه.. عشان كده بنرشحلك الدهب عشان تستثمر فيه وانت مطمن على المكسب.