طوارئ في بنوك مصر.. واجتماعات حاسمة خلال ساعات

يا ترى ايه اللى بيحصل فى بنوك مصر فى الساعات الأخيرة؟ وايه سر الاجتماعات الكبيرة اللي بتعملها مجالس ادارات البنوك؟ وايه علاقة كل التحركات دي ببيان البنك المركزي الأخير؟ وايه القرارات المهمة اللى هتصدر خلال الساعات الجاية؟

في الساعات الأخيرة فيه تحركات مهمة بتحصل داخل البنوك المصرية ومجالس الادارات بتعقد اجتماعات مكثفة لوضع سياساتها فيما يتعلق بحدود السحب اليومي للعملات الأجنبية بعد الاشاعات والكلام غير الصحيح اللى انتشر على بعض منصات التواصل الاجتماعي عن توجيهات أصدرها البنك المركزي للبنوك بوضع سقف للسحب اليومي بداية من الشهر الجاي.

ورد البنك المركزي على الأنباء دي وشرح الموقف بالكامل وقال انه يجب  التأكيد على أن البنك المركزي قام بتاريخ 15 أبريل 2024 بزيادة الحد الأقصى اليومي لعمليات السحب النقدي بالعملة المحلية ليُصبح 250 ألف جنيه بدلاً من 150 ألف جنيه و30 ألف جنيه من ماكينات الصراف الآلي بدلاً من 20 ألف جنيه، وذلك تيسيراً على المتعاملين مع البنوك.

وبخصوص حدود صرف العملات الأجنبية، نفى المركزي مطالبته البنوك بوضع حدود على السحب اليومي وقال ان الأمر متروك لكل بنك على حده لتحديد سياسته بشأن حدود السحب واعتمادها من مجلس الإدارة.
وطالب البنك المركزي بضرورة تحري الدقة لدى تداول أي معلومات غير دقيقة خاصة بالقطاع المصرفي لتفادي أي تداعيات سلبية ممكن تؤدي إلى التأثير المباشر على القطاع المصرفي بصفة خاصة والاقتصاد القومي للدولة بصفة عامة.

وفي أول رد فعل على اللي بيحصل أعلن محمد الإتربي رئيس اتحاد بنوك مصر، ورئيس مجلس ادارة بنك مصر، إن البنك المركزي ما أجبرش البنوك على وضع حدود للسحب الدولاري، ونفى هو كمان ما تم نشره عبر مواقع التواصل الاجتماعي بشأن وضع حدود من قبل البنك المركزي للسحب الدولاري في البنوك.

الاتربي أكد أن قرار حدود السحب الدولاري متروك للبنك نفسه هو اللى يحط السياسة الخاص بيه وفقا لظروفه وحساباته وقال ان فيه حدود للسحب الدولاري في بنك مصر هيتم عرضها على مجلس الإدارة وهيتم الإعلان عنها خلال الأسبوع الجاي.

طب إيه القرارات اللى ممكن تصدر عن مجالس ادارات البنوك الفترة الجاية؟

البنك المركزي بالبلدي كده رما الكرة فى ملعب البنوك وقال كل بنك يحدد حدود السحب زي ما هو عاوز .. وده بيؤكد على كام حاجة أولها ان فيه وفرة فى العملات الأجنبية داخل القطاع المصرفي ومفيش أزمة فى توافر الدولار زي ما بعض الصفحات واللجان الاليكترونية بتحاول تروج وتانى حاجة البنك المركزي بيثبت بالدليل القاطع ان فيه شفافية فيما يتعلق بملف الدولار وتالت وأهم حاجة ان البنوك بتشتغل باستقلالية وحرية كاملة وهى اللى بتحدد سياستها فيما يتعلق بحدود السحب بالعملات الأجنبية

وطبيعي كل بنك هيجتمع وهيدرس الملف بشكل مستقل وهتلاحظ بعد شوية ان حدود سحب الدولار من البنوك مش متساوية وكل بنك هيعلن الحد بتاعه وفقا لوضعه الخاص.

يعنى كده مفيش أزمة فى الدولار ؟

حاليا مفيش أى أزمات فى توافر الدولار والبنك المركزي بالتعاون والتنسيق مع كل البنوك بيوفر العملة الصعبة للشركات والمستوردين وتقدر تعرف ده وتتأكد منه من حجم البضايع اللى تم الافراج عنها من المواني المصرية طول الشهور اللى فاتت وتقدر تتأكد من ده كمان من خلال فاتورة الاستيراد الللى تم صرفها فى ال 8 شهور اللى فاتوا من أول 2024 ولحد دلوقتى كمان الدولة بتسد كل التزاماتها الخارجية ومفيش أى تأخير حصل فى سداد أقساط أو خدمة ديون بالاضافة كمان لسداد متأخرات الشركات الجنبية العاملة فى مصر وتحديدا فى قطاع البترول.