قرار صادم من وزارة التموين بوقف صرف السكر علي بطاقات التموين

 

التموين معروف أنه واحد من السلع اللي بتقدمها الحكومة للمواطنين، خصوصا أنه سلع بتدخل كل بيت مصري، لكن مؤخرًا وزارة التموين والتجارة الداخلية اصدرت قرار هيزعل كل المصريين بخصوص السكر اللي علي بطاقات التموين.. يا تري اية هو القرار.. وهل الدولة هتوقف صرف السلع علي بطاقات التموين
 

التموين علي مدار سنين طويلة هو السلع اللي كل الشعب المصري بينتظرها من شهر للثاني، علشان يجيب السلع التموينية اللي بيحتاجها بيته كل شهر خصوصا السكر والزيت، واللي لو حصل فيهم مشاكل او تاخر صرف هتكون أزمة في كل البيوت المصرية، خصوصا بعد ما الدولة أخذت قرار من فترة برفع اسعار العيش علي بطاقات التموين من 5 الي 20 قرش .
طيب اية القرار اللي اخذته الدولة بخصوص اسعار السكر علي التموين؟.
مؤخرا وزارة التموين والتجارة الداخلية ممثلة في الإدارة المركزية لشؤون الرقابة على الأنشطة السلعية والمعاملات التجارية أصدرت قرارًا بوقف صرف السكر الحر على البطاقات التموينية بمعدل اثنين كيلو لكل بطاقة والاكتفاء بصرف الحصة الأساسية للحد من تسرب الكميات إلى السوق السوداء.

قرار وزارة التموين بوقف صرف السكر الحر علي بطاقات التموين، وصل في الايام اللي فات علي كل مديريات التموين والمنافذ التموينية وفروع شركات الجملة، واصداره جاء بناء  علي خطاب من رئاسة مجلس الوزراء بخصوص الإجراءات المتخذة لضبط الأسواق والحد من الارتفاع المستمر وغير المبرر في أسعار السلع الاستراتيجية اللي بتهم كل المواطنين.
طيب اية الي بتعمله وزارة التموين علشان تراقب الأسعار في الأسواق؟.
رئيس مجلس الوزراء وجه الجهات المعنية بتكثيف الحملات الرقابية على أماكن تخزين السلع الغذائية الاستراتيجية، واتخاذ الإجراءات القانونية تجاه الكميات المحتجزة عن الأسواق، وقال أن قرار وقف بيع السكر الحر علي بطاقات التموين جه للحد التسريب اللي بيحصل للسوق السوداء، خصوصا أنه سعره كان بيوصل لـ27 جنية وده حاليا اقل من اسعار السكر اللي موجودة في الاسواق، وبالتالي البقالين كانوا بيبعوا للتجار وبيتم اعادة بيه للمواطن بسعر أعلي من السعر اللي اقرته الدولة.
طيب مصر بتنتج حاليا اد اية من السكر، وهل القرار ده هياثر علي سعر السكر اللي بتقدمه الدولة علي بطاقات التموين؟.
مصر حاليا بتنتج سنويًا 2.8 مليون طن من السكر منها 1.8 مليون طن من بنجر السكر ومليون طن من قصب السكر، وبيوصل للمواطن عن طريق المبادرات الحكومية لبيع السلع والسوبر ماركت الكبيرة بسعر يقارب 27 جنيهًا للكيلو جرام.

وزارة التموين والتجارة الداخلية قالت أن سعر الكيلو الواحد علي بطاقات التموين هيفضل بسعر 12.6 جنيه، وهيتم توزيع كيلو واحد لكل فرد مقيد على البطاقة التموينية وبحد أقصى 6 كيلو للبطاقة، وكان الدولة بتصرف كميات إضافية من السكر الحر بسعر 27 جنيهًا للكيلو، بواقع كيلو لكل بطاقة فيها 3 أفراد أو أقل، و2 كيلو للبطاقات اللي بتضم 4 أفراد أو أكثر، ولكن هيتم وقف العمل بالقرار ده وهيكون صرف السكر التمويني بس في الايام اللي جاية .