لو بتفكر تشتري سيارة مستعملة.. شوف السوق بيقولك إيه!

يا ترى لو بتفكر تشتري عربية مستعملة إيه أول خطوة هتعملها، تجري على السوق وتجهز فلوسك وورقك وتشتري قبل ما الأسعار تعلى، ولا تستنى شوية وتلقط فرصة كويسة توفر بيها فلوسك.. هنقولك كل التفاصيل في التقرير التالي.

كلنا عارفين، إن سوق السيارات المستعملة بيشهد دلوقتي موجة ارتفاعات كبيرة فى الأسعار، وده بيقف وراه أسباب كتير، من أهمها توقف عمليات الاستيراد من الخارج خلال الشهور الأخيرة، واللي ساهم طبعا فى حدوث زيادات يومية في سوق المستعمل.

كمان انخفاض المعروض من العربيات المستعملة كان من ضمن أسباب ارتفاع أسعارها، وده تسبب في عودة ظاهرة "الأوفر برايس" من جديد فى سوق السيارات الجديدة.

طب امته هيرجع الاستيراد من تاني، وهل ممكن الأسعار تنخفض الفترة الجاية؟

بص يا سيدي، دلوقتي استيراد العربيات الجديدة متوقف وده أثر بالفعل على السوق كله، وخلي المستهلك يلجأ للمستعمل، ووفقًا لآليات العرض والطلب كلما زاد الطلب عن المعروض من الطبيعي بيرتفع السعر، وهو ده اللي بيحصل دلوقتي في سوق السيارات المستعملة.

كمان ارتفاع الأسعار جه نتيجة توقف الاستيراد التجاري والشخصي، ونقدر نقولك إن وضع السوق في الفترة الحالية بيشير لارتفاعات جديدة في الأسعار، ومن هنا لازم يبقي في تدخل حكومي لحل الأزمة دي لأن الاستمرار فيها هيؤدى لحدوث مشكلات أكبر.

كمان، المتاح فى سوق المستعمل والجديد مبقاش يكفى، ولما يقل المعروض بترتفع الأسعار.

ضيف على كل ده، إن شهري يوليو وأغسطس هما موسم شراء السيارات، ودلوقتي المخزون عند الوكلاء أعداد ضئيلة من بعض أنواع السيارات، وده كان سبب بردو في عودة ظاهرة "الأوفر برايس" بالنسبة للسيارات الجديدة، ووصلت الزيادة فيها لـ١٠٠ ألف جنيه لبعض نوع السيارة، وبالتالي كل ده أثر على سوق المستعمل، لأن سوق الجديد والمستعمل مرتبط ومتأثر ببعضه.

ولو ناوي حضرتك تشتري عربية مستعملة بعد ما قولنالك السوق رايح فين، فهنقدملك شوية نصايح مهمة عشان مايضحكش عليك وماتخسرش فلوسك.

لازم حضرتك، ماتبهرش بشكل العربية أو لونها، أو إن شكلها فاخر مثلا، لأنك ممكن تنخدع بالمظهر الخارجي خاصة لو مش عندك خبرة كافية في العربيات، ومن هنا لازم تجمع كل المعلومات اللازمة قبل شراء السيارة، منها متوسط السعر في السوق، والأداء العام، وحالة المحرك، وتوفر قطع الغيار ومراكز الصيانة.

وكمان تعرف المميزات والتجهيزات الإضافية، زي أنظمة مساعد قائد السيارة الذكية وإضافات اتصال الهاتف الذكي عبر Apple Car Play وAndroid Auto، واكتشاف سنة الإصدار وتاريخ السيارة وهل مسجلة في التأمين ولا لأ، وكذلك رقم الهيكل وخلافه.

كمان حضرتك لازم تعمل معاينة للعربية المستعملة كويس جدا من الداخل أو الخارج، عشان لو لاحظت مشكلة مثلا أو تغير اللون بسبب الاحتكاك أو الطلأ لإخفاء عيوب أو اصطدامات، وكمان تشوف حالة الكراسي والفرش الداخلي وهيكل العربية، والعجلات الأمامية والخلفية وخلافه.

ولازم تستعين بخيير أو متخصص فني تكون بتثق به، عشان يقوم بفحص العربية كويس، ويتأكد من عدم وجود صدمات أو خبطات، ويقدم لك تقرير شامل بعيوبها ومميزاتها.

كمان انتبه عند انخفاض السعر، لأن ممكن جدا تنخدع، فامتجريش ورا انخفاض السعر وتعتبرها فرصة، لأن ممكن يكون السعر المنخفض دلالة على عيب موجود في العربية وبيتم إخفاؤه وراء سعر جذاب للتخلص منها.

ماتنساش، سجلات الصيانة الدورية، اللي هتعرف منها حالة العربية قبل شرائها، وعقود الملكية والذي منه عشان تضمن عملية بيع سليمة، وياريت البائع يسلم صورة بطاقته للمشتري والعكس عشان يقدوا يوصلوا لبعض بسهولة في حالة وجود خلل في العربية أو الاتفاق.