هوجة الدولار.. إيه اللي بيحصل في البنوك وهل أيام السوق السودا هترجع

ايه اللي حصل في البنوك النهاردة وإزاي الدولار قرب على 50 جنيه وياترى إيه اللي جاي والمؤشرات بتقول إيه.. وهل دا ليه علاقة بالتعويم الجديد ولا ده سعر سوق.. تابعونا في الفيديو
 

النهاردة سوق الصرف المصري كان على موعد مع صدمة كبيرة وهي إن سعر الدولار قفز بأكتر من 60 قرش في بعض البنوك ولأول مرة يكسر ال49 جنيه ويقترب كمان من 50 جنيه بعد ما سجل في التعاملات الصباحية 49.45 جنيه في بعض البنوك والرقم دا محصلش من ساعة قرار التعويم.. طيب ايه الحكاية ورايحين على فين؟.
شوف حضرتك كل سوق وليه أصول ماشي عليها وفي الاقتصاد واحد زائد واحد يساوي اتنين ملهمش تالت وانت كحكومة او كدولة التزمن بسعر صرف مرن وحر يبقي طبيعي تشوف الدولار كل يوم في سعر لأن الحكاية عرض وطلب وملهاش علاقة بقوة الدولار ولا ضعف الجنيه وطالما الطلب بيزيد على الدولار يبقي سعره هيفضل يرفع والعكس صحيح والموضوع ملهوش علاقة بردة بالتدفقات الدولارية ولا الاحتاطي النقدي ولا الودايع الدولارية لكن ليه علاقة بالمعروض الدولاري في البنوك باعتباره النافذة اللي بيتعامل معاها سوق الصرف.
طيب إيه خلي الطلب على الدولار يزيد؟
لو بصينا حولينا هنعرف ليه الدولار بيزيد بالشكل ده وإزاي مصر موجودة في وسط اقليم مشتعل بالصراعات والتوترات والأزمات من كل ناحية والتطورات الاخيرة في الصراع ده كان ليها تأثير شديد على مصر بحكم قربها الجغرافي من مناطق الاحدا ولأن خطوط التجارة الدولية بتتأثر بشكل كبير ومنها طبعا قناة السويس واللي ايراداتها بتنزف بالخسارة من فترة.. 
كمان التوترات دي خلت الاستثمارات الجديدة تخاف تيجي المنطقة لأن الصراع السياسي والعسكري بيزيد في المنطقة وكمان دا خلى الأموال الساخنة تبدأ تهرب تاني من أسواق المنطقة وفيه حوالي 5 مليار دولار خرجت من مصر بسبب الاحداث الجارية وتخوفات خفض المركزي للفايدة.
القصد من اللي بنقوله كله إن الأسواق في العالم كله مرتبطة ببعضها وكل اقتصاديات الدول اللي في اقليم الصراع بتعاني بشكل كبير جدا لأن فيه تأثير مباشر على التدفقات الاستثمارية وعلى تباطيء النمو وتأثر حركة التجارة عشان كده مش عاوزين نتخض أووي من ارتفاع سعر الدولار في البنوك لأن العبرة بقوة الدولة في الاقتصاد مش بسعر عملتها وعلى فكرة على مستوى التدفقات الدولارية في البنوك فالوضع مطمئن جدا ودا اللي بتقوله نشرات البنك المركزي المصري واخرها زيادة الودائع بالدولار للعملاء في البنوك واللي زادت 2 مليار دلاولار في أقل من شهرين وكمان ارتفاع تحويلات المصريين بالخارج ل24 مليار دولار وارتفاع وتيرة التنازل عن الدولار في شركات الصرافة وغير مليارات الاستثمارات الجديدة في قطاعات كتير زي قطاع التنقيب عن البترول وكمان في المناطق الصناعية الجديدة والمشروعات اللي كل يوم بنسمع عنها.

طيب السوق السودا للعملة تردع تاني؟
طول مافيه سعر مرن مفيش مجال لعودة تجار العملة أو السوق السودا والحالة الوحيدة اللي هترجع فيها هي إن المركزي يثبت السعر ويحصل شح في الأسواق وهنا هتظهر من تاني السوق الموازية ودي شيئ من المستحيل طبعا.