هتتصدم من فاتورة الشهر ده.. أسرار وتفاصيل الزيادات الجديدة في أسعار شرائح الكهرباء

وزارة الكهرباء وبشكل مفاجئ أعلنت عن انتهاء خطة تسعير الكهرباء الحالية واللي شغالين بيها من شهر يناير اللي فاتت بدون اي مقدمات.. يا تري الأسعار الجديدة هتبدا العمل بها أمتي وهتوصل لكام.
 
امبارح وبدون اي مفاجئات جهاز تنظيم مرفق الكهرباء وحماية المستهلك اعلن عن نهاية العمل بخطة تسعير شرائح الكهرباء الحالية واللي كنا شغالين بيها من بداية عام  2024، علشان بالمعني ده نكون بدأنا من بداية شهر أغسطس الحالي العمل بخطة جديدة لتسعير شرائح الكهرباء، لكن الغريب أن وزارة الكهرباء والطاقة المتجددة أو مجلس الوزراء معلنش عن انتهاء خطة العمل بتسعير  شرائح الكهرباء القديمة، ولا التسعيرة الجديدة هتوصل لكام.
طيب أسعار شرائح الكهرباء القديمة كانت كام والجديدة هتوصل لكام ؟.
سعر الكيلووات من الكهرباء في خطة تسعير شرائح الكهرباء القديمة كانت سعر في الشريحة الأولى اللي هيا من 0 إلى 50 كيلو وات ل 58 قرش والشريحة الثانية من 51 إلى 100 كيلو وات بتوصل ل 68 قرش والشريحة الثالثة من 101 إلى 200 كيلو وات بيوصل سعرها 88 قرش والشريحة الرابعة من 201 إلى 350 كيلو وات بيوصل سعرها 108 قروش والشريحة الخامسة من 351 إلى 650 كيلو وات بيوصل سعرها 138 قرش والشريحة السادسة من 651 إلى 1000 كيلو وات بيوصل سعرها 158 قرش والشريحة السابعة أكثر من 1000 كيلو وات بيوصل سعرها 178 قرش.
طيب ليه اصلا الكهرباء عايز تزود الأسعار في الوقت ده ؟.
ومصادر مطلعة بوزارة الكهرباء والطاقة المتجددة قالت إن خطة تسعير شرائح الكهرباء الحالية كان مقررا انتهاء العمل بها مع نهاية شهر يونيو الماضي، والدولة قررت مد العمل بها لشهر إضافي انتهى بنهاية شهر يوليو الماضي أيضا، والمد ده كان بسبب أزمة تخفيف الأحمال التي كان يتم العمل بها خلال الفترات الماضية واللي انتهي العمل بها من 20 يوليو اللي فات ومستمر وقف العمل بها لحد نهاية شهور الصيف وتحديداً في نصف شهر سبتمبر اللي جاي.
المصادر قالت كمان أن الزيادات الجديدة في أسعار شرائح الكهرباء السبب فيها الأعباء الاقتصادية اللي الدولة بتدفعها لسداد التزامات وزارة البترول والثروة المعدنية لشراء الوقود اللازم لتشغيل محطات توليد الكهرباء واللي الدولة استوردت منه كميات كبيرة في الأيام الي فاتت علشان تقضي علي أزمة تخفيف الاحمال، 
المصادر قالت كمان أن الزيادات الجديدة في أسعار شرائح الكهرباء هتتراوح من 20 الي 30%،  وان الدولة كملت دورها في مراعاة محدودي ومتوسطي الدخل  في الخطة الجديدة لتسعير شرائح الكهرباء خصوصا علي 3 شرائح الأولى من الاستهلاك المنزلي وده بت توجيهات مباشرة من القيادة السياسية واللي وجه بدعم الفئات الأولي بالرعاية ومحدودي الدخل.

المصادر قالت كمان أن تكلفة سعر الكيلووات ساعة بيوصل سعره على الدولة الي 223 قرشًا، والمواطن بيشتريه بسعر 58 قرش في الشريحة الأولى وبيوصل متوسط دعم الدولة لكل كيلو وات ساعة على مختلف الشرائح إلى جنيه كامل، وخطة التسعير الحالية كانت علي أساس أن سعر الدولار بيوصل لما يقرب من 31 جنية وحاليا الدولار قرب سعره علي 45 جنية، وان التغيرات المتتالية في سعر الدولار هيا السبب الأساسي في الأسعار الجديدة خصوصا أن نسبة كبيرة من الوقود والغاز الطبيعي والمازوت اللي محطات توليد الكهرباء بتحتاجه الدولة بتستورده من الخارج .