مفاجأة الـ 25 مليار دولار.. لو عاوز تعرف فلوس راس الحكمة راحت فين .. اقرأ هذا التقرير
يا ترى فلوس راس الحكمة راحت فين ؟ وازاى الحكومة سايبة أزمة الكهربا وهى معاها دولارات اد كده على قلبها؟ وايه حكاية الـ 25 مليار دولار اللى طاروا مرة واحدة؟ وازاى رغم كل التدفقات الدولارية اللى استقبلتها مصر مؤخرا سعر الدولار رجع يرفع تاني؟ .. لو عاوز تعرف اجابة كل الأسئلة دي اقرأ هذا التقرير.
مفيش حد فى مصر سواء بقا اعلامي او مواطن عادي الا وبيسال هي فلوس صفقة راس الحكمة راحت فين وليه الدولة مش عارفة توفر مليار دولار لحل ازمة الكهربا وهي دخلها ما يقرب من 50 مليار دولار فى اخر كام شهر سواء تمن صفقة راس الحكمة او من صندوق النقد أو حتى من مؤسسات تمويل تانية .. ويمكن السؤال ده كان اكتر سؤال شاغل بال المصريين
وفى الساعات الأخيرة معهد التمويل الدولي كشف بعض التفاصيل اللى بتقول الحكومة عملت ايه بالظبط بفلوس راس الحكمة
المعهد أفاد فى تقرير حديث ليه ان مصر سددت 25 مليار دولار من دينها العام المحلي والخارجي من مارس اللى فات ولحد دلوقتي وده تقريبا بيمثل ما يقرب من 15% من قيمة ديون مصر.. واكد المعهد ان السداد جاء نتيجة لصفقة رأس الحكمة واللي تضمنت تحويل ودائع إماراتية بقيمة 11 مليار دولار لدى البنك المركزي إلى استثمارات بالعملة المحلية إضافة إلى سداد سندات "يوروبوند" بقيمة 2 مليار دولار بما يعادل 7% من الناتج المحلي.
وبسبب سداد مصر لجزء كبير من التزماتها الخارجية أبدى عدد كبير من المستثمرين تفاؤلهم بالآفاق المستقبلية للاقتصاد المصري بسبب التدفقات الضخمة من صفقة رأس الحكمة.
وفى مؤتمر افتراضي نظمه المعهد بمشاركة 100 متحدث ومشارك لمناقشة الوضع الاقتصادي في مصر أكد المستثمرين أن مصر لديها سجل حافل من الالتزام المالي وتحقيق أهدافها المالية وأن هدف الوصول بالفائض الأولي إلى 3.5% من الناتج المحلي ممكن هدف طموح جدا خصوصا لو خدنا فى الاعتبار أن 1% من الهدف ده هيتحقق من حصيلة برنامج الطروحات الحكومية.
و اتفق المشاركين فى مؤتمر معهد التمويل الدولى على أن مصر هتحقق عام آخر من الفوائض الأولية في الموازنة وان ده هيضع مسار الدين العام في الاتجاه النزولي بهدف خفض الدين إلى 80% من الناتج المحلي بحلول يونيو 2027.
تقرير معهد التمويل الدولي قال ان المبلغ المتبقي من صفقة راس الحكمة بعد سداد جزء كبير من ديون مصر هيتم الاحتفاظ بيه في حسابات هيئة المجتمعات العمرانية لاستخدامه في المشاريع المرتبطة برأس الحكمة وتوقع أن يسهم التشديد المالي في المزيد من خفض الدين العام وان ده يؤدي إلى تحقيق فوائض أولية أكبر.
وأكد المعهد أن الإصلاحات الأخيرة اللي عملتها الحكومة هتقلل الإنفاق خارج الموازنة واللى كان بيتسبب فى ضغط كبير على المالية العامة للدولة وتوقع تقر المعهد بدء البنك المركزي في خفض أسعار الفائدة وقال ان ده هيتيح للحكومة تقليل نسبة فاتورة الفوائد اللي بتدفعها على الدين، واللى تجاوزت 100% من الإيرادات.. وقال كمان أن الحكومة فضلت دفع فايدة كبيرة على المدى القصير عن عمد بدلاً من الالتزام بفائدة أعلى لفترة أطول، وعشان كده بمجرد خفض الفائدة وتراجع التضخم، من المتوقع أن تنخفض فائدة الدين الحكومي بشكل ملحوظ.
