مفاجأة في سياسة تخفيف الأحمال.. هل الناس فهمت غلط؟

 
امبارح كلام كتير حصل بخصوص خطة تخفيف الاحمال، والناس كلها بتقول أن قطع الكهرباء هيزيد من ساعتين ل 3 ساعات.. يا تري أية حكاية الموضوع ده وهل فعلا قطع الكهرباء هيزيد من ساعتين ل 3 ساعات... وهل موضوع تخفيف الأحمال ده ملوش اخر .
 
موضوع تخفيف الأحمال بقي موضوع الساحة دلوقتي خصوصا أن دخلنا في شهور الصيف واللي فيها درجة الحرارة بتكون مرتفعة والناس محتاجة حاجة تشغلها علشان تخفف درجات الحراره زي المراوح والتكييفات وغيرها من الوسائل اللي بنستخدمها لتخفيف درجات الحرارة .
الكلام اللي انتشر علي المواقع الإخبارية ووسائل التواصل الاجتماعى انتشر وبشكل مكثف قوي، ولكن الحكومة ممثلة في وزارة الكهرباء والطاقة المتجددة ووزارة البترول والثروة المعدنية طلعوا وقالوا إن زيادة تخفيف الاحمال من ساعتين ل 3 ساعات هيكون ليوم واحد فقط، وده بسبب إجراءات الصيانة الوقائية فى جزء من شبكات تداول الغاز الاقليمية واللي تزامن مع الموجة الحارة اللي بتضرب كل محافظات الجمهورية في الوقت الحالي، وعلشان كده الدولة قررت زيادة مدة تخفيف الأحمال من ساعتين ل 3 ساعات .
طيب هل زيادة مدة تخفيف الاحمال من ساعتين ل 3 ساعات هيكمل معانا في الأيام اللي جاية والا أية الحكاية ؟.
لحد اللحظة اللي احنا مع حضراتكم فيها دي الدولة ملتزمة بخطة تخفيف الاحمال المعلنة من الساعة 3 عصرا الي الساعة 7 مساءا واللي أعلنت عنها في شهر مايو اللي فات بناء علي الخطاب اللي اتقدمت بيه وزارة التربية والتعليم لتعديل خطة تخفيف الاحمال علان تكون في الفترة المسائية بدلا من الفترة الصباحية بسبب امتحانات منتصف العام بامتحانات الثانوية العامة وهتفضل الدولة شغالة بنفس الخطة دي لحد نهاية شهر يوليو اللي جاي .
وعلشان نكون عارفين أن المركز التحكم القومي للكهرباء كل يوم الساعة 10 الصبح بيبعت خطة التخفيف اليومية واللي ممكن تختلف من يوم عن الثاني ولازم تكون في إطار المدة اللي الدولة حطتها من 3 الي 7 مساءا، يعني مينفعش يكون في قطع كهرباء قبل الساعة 3 ولا بعد الساعة 7، ولو حصل قطع في الكهرباء عندك خارج المواعيد دي هيكون غالبا بسبب عطل فني او عمليات صيانة أو اي حاجة بخلاف تخفيف الاحمال وفي الحالة دي حضرتك هتتصل علي الخط الساخن للوزارة بالرقم 121 علشان تبلغهم علي العطل وعلي قطع الكهرباء وهما هيتعاملوا وفرق الصيانة هتنزل بشكل فوري لإصلاح العطل .
طيب اية اخر موضوع تخفيف الاحمال خصوصا أن الناس جابت آخرها من قطع الكهرباء؟.
في شهر  يوليو اللي جاي الدول هترفع أسعار شرائح الكهرباء بشكل عام وهتكون حدود الرفع من 30 الي 35% علي أول 3 شرائح وهيكون الحد الاعلي لرفع الأسعار 40% ودي هتكون وسيلة للوزارة أنها تسد المديونيات اللي عليها خصوصا أن وزارة البترول والثروة المعدنية لها ارقام كبيرة جدا عند وزارة الكهرباء بتاع وقود وغاز طبيعى الكهرباء أخذته علشان تشغل بيه محطات توليد الكهرباء ولسه لحد دلوقتي الكهرباء متدفعتش تمنه خصوصاً أن الوزارة عندها كمية كبيرة من الخسائر بسبب ارتفاع نسبة الفقد اللي موجودة الي الشبكة القومية للكهرباء ودلوقتي كيمة الكهرباء اللي الدولة بتنجها اعلي بكتير من الإيرادات اللي بتدخل لخزينة الدولة، وامبارح رئيس الشركة القابضة لكهرباء مصر قرر إقالة المهندس مدحت فودة رئيس شركة جنوب القاهرة لتوزيع الكهرباء بسبب ارتفاع نسبة سرقة التيار عنده علي الشبكة .
وعلشان نكون عارفين أنه مع نهاية السنة دي الدولة هتنتهي تماما من موضوع تخفيف الأحمال ومش هيكون عندنا قطع كهرباء تاني علي الشبكة القومية للكهرباء.