نصيحة العبار وحلم الـ100 مليون سائح.. مفاجأة الملياردير الإماراتي
هي مصر تقدر تجذب 100 مليون سائح سنويا وهل عندها الإمكانيات وايه نصيحة العبار لتحقيق 100 مليار دولار ايرادات سياحيه في السنة.. خليكم معانا هنعرف التفاصيل في الفيديو ده .
قلنا كتير قبل كده إن الإمكانيات والتنوع السياحي في مصر مش موجود في أي مكان في العالم ودي حقيقة ومش مبالغة وفين الدولة اللي فيها اهم حضارة في الكوكب ورغم كل الكنوز الفرعونية اللي عندها لكن ده 1% بس من الآثار المكتشفة بحسب تأكيد الدكتور زاهي حواس ومسؤولين في وزارة الآثار وفين الدولة اللي عندها بدل حضارة 3 حضارات فرعونيه وقبطية وإسلامية وغير سياحة الترفيه والمنتجعات وسياحة العلاج والاستشفاء والسفاري وغيرها من أنواع السياحة.
وسبق وقلنا إن مصر عندها إمكانيات سياحية وترفيهية تخليها افضل من باريس ومدريد اكبر دولتين بيستقبلوا سياح في العالم وايراداتهم بتعدي ال110 مليار دولار وكفاية تعرف إن دولة زي اسبانيا السياحة عندها معتمدة على الآثار الأندلسية الإسلامية بس ورغم كده استقبلت 85 مليون سائح في 2023 بايردات 108 مليار يورو ومصر اللي عندها كل الحضارات دي والشواطئ والسفاري استقبلت 15 مليون سائح بإيرادات 13.6 مليار دولار وده بيكشف قد ايه مصر مظلومة في سوق السياحة العالمي وإن أقل دخل بالامكاتيات اللي عندها 150 مليار دولار في السنة لو تم استغلال الإمكانيات السياحية الضخمة والفريدة في مصر.
طيب ليه بنتكلم عن السياحة المصرية النهاردة... عشان وضعنا السياحي الغير منطقي خلى رجل الأعمال الإماراتي محمد العبار، يتكلم ويقول إن مصر قيمتها اكبر من كده بكتير في القطاع ده واللي بيعتبر اسهل قطاع يجيب مليارات الدولارات سنويا لأن كل الإمكانيات متوفرة .. تعالو نشوف الملياردير الإماراتي قال ايه.. العبار قال أن مشروع رأس الحكمة بين مصر والإمارات هيحقق للطرفين استفادة تجارية في المنطقة هي الأجمل في مصر والعالم وقال كمان إنه هيكون في مقدمة المستثمرين في المشروع إذا تم فتحه للمستثمرين.
العبار وجه نصايح للمسؤولين في مصر، وطالبهم بفتح الباب أمام السياحة وفتح المطارات من خلال رفع التأشيرة من على الدول الأوروبية وقال نصا إذا لم يتحدث المصريون عن 100 مليون سائح فهذا تضييع للوقت لأن من وجهة نظره المنطقة بتتمتع بوجود عدد كبير من المحميات الطبيعية والمناطق الأثرية والخلجان والرؤوس البحرية والكثبان الرملية، إضافة إلى توافر بيئة طبيعية مناسبة لكافة أنواع الأنشطة السياحية، سواء البحرية أو الشاطئية أو التاريخية أو سياحة السفاري والأنشطة الصحراوية المتنوعة، بجانب وجود نواة أولية للتنمية السياحية من طاقة فندقية مميزة ومراكز للمنتجعات والمؤتمرات متكاملة الخدمات والمرافق لتنمية السياحة المحلية والدولية معاً ولضمان استغلال الشاطئ على مدار العام.
كل ده والعبار بيتكلم عن منطقة سياحية واحدة فما بالك لو تم الاستفادة من باقي المناطق الساحلية والأثرية والتنوع السياحي اكيد مصر هتبقي في حتة تانية خالص وهتدخل مليارات الدولارات وعلى فكرة دولار السياحة قيمته اكبر من قيمة دولار التصدير مثلا لانه الخدمة مش مكلفة ومش بتحتاج أدوات انتاج ومكن وخطوط انتاج وجمارك وكمان السياحة قادرة تقضي على البطالة في مصر لأنها قطاع غزير العمالة وبيشغل باقي قطاعات الاقتصاد المصري كله.
