الثلاثاء 25 يونيو 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

دهب ولا عقار دلوقتي.. لو محتار تشغل فلوسك فين شوف الفيديو ده

الأربعاء 24/أبريل/2024 - 02:40 ص
الذهب
الذهب


 

معاك فلوس ومش عارف تستثمرها فين.. ومحتار بين الدهب والعقار وشهادات الادخار احنا هنقولك ميزة وعيوب كل استثمار فيهم وانت تختار براحتك.. خليك معانا لنهاية الفيديو.



طبيعي أي حد معاك فلوس زيادة دلوقتي محتار يستثمرها في ايه اول حاجة بيفكر فيها هي الدهب وبعدها العقارات وممكن يفكر  يريح دماغه ويحطها في شهادات ادخار بالبنوك أو ممكن يعمل بيها مشروع وعشان تخرج من الحيرة والتفكير بانكير بيقدملك ميزة كل نوع من الاستثمار.. أول حاجة الدهب ورغم تقلب الأسعار كل شوية فوق وتحت لكن يفضل اهم استثمار بيوصي بيه أهل الاقتصاد لأنه استثمار طويل الأجل والدهب بيزيد دائماً على المدى الطويل وده غير أنه ليحفظ قيمة فلوسك ودي أهم ميزة فيه وده غير ان سهل تشيله في مكان أمان وكمان حاجة تانية بتخلي الدهب هو الحل الأمثل للاستثمار دلوقتي وهي إن كل التوقعات بتقول إن المعدن الأصفر سعره هيقفز على مدار الشهور الجاية عالمياً بسبب التوترات السياسية والعسكرية في اكتر من منطقة في العالم واي صراع بيرفع أسعار الدهب على طول ده غير اتجاه الفدرالي الأمريكي لخفض أسعار الدولار وزيادة الطلب على الدهب من البنوك المركزية العالمية والتوقعات بتقول إن سعر الدهب عالمياً هيوصل 3 آلاف دولار من حوالي 2400 دولار وصلهم يوم الجمعة اللي فات.
اما بخصوص العقارات فهي بردوا استثمار طويل الأجل لكن مشكلته إنه معرض للانخفاض أو الاحتفاظ بالقيمة اللي اشتريته بيها أو هيزيد بشكل بسيط لأن أسعاره بتعتمد على أسعار مواد البناء والعرض والطلب ومواد البناء مرشحة اسعارها تنزل الفترة الجاية لأن أسعارها مرتبطة لحد كبير بأسعار الدولار في مصر واللي متوقع ينزل الأيام الجاية بسبب كثرة التدفقات الدولارية لكن كل ما استنيت عليه ممكن يحققلك مكسب لكن مشكلة الاستثمارات في العقارات أنها بتحتاج لجهد زي تستعين بمكاني وعقود وتسجيل وشهر عقاري وتصاريح واجراءات نقل ملكية نفس الكرة لما تيجي تبيع.
نيجي بقي للاستثمار في شهادات الادخار في البنوك ودي ميزتها انها اكتر وسائل الاستثمار امان وقلة في الجهد وكل اللي عليك انك توصل البنك وفي ظرف دقايق تشتري الشهادة وتحط فلوسك وانت مطمئن لأن مفيش اي خطر عليها في البنك وبتكون مضمونة وبتاخد فوائد ثابتة كل شهر او حسب نوع الشهاده لكن عيبها أنه مهما كانت فوائدها عالية لكن مع مرور الوقت هتلاقي إن الاستثمار في حاجات تانية هيجيبلك مكسب اكتر ده غير إن قيمة فلوسك بترتبط بسعر الجنيه قدام الدولار ولو نزلت فقيمة فلوسك في البنك بتقل وده احتمال ضعيف لأن الدولار سعره المفروض هينزل للأسباب اللي قلنا عليها قبل كده.
اما الاستثمار في المشروعات فده ليه فوايد كبيرة جدا زي ارتفاع قيمة الأرباح حسب المشروع وميزة انك بتدير فلوسك بنفسك وده غير أنه بيكون عندك المرونة في إدارة فلوسك في النشاط التجاري أو الخدمي موضوع استثمارك والتوسع في النشاط حسب السوق وده بيحققلك أرباح سريعة واكبر من اي استثمار تاني بيكون ثابت أو بيحتاج وقت عشان تكسب زي الدهب أو العقارات أو الشهادات.
الخلاصة كل انواع الاستثمار اللي قلنا عليها مفيدة وتحفظ فلوسك كل اللي عليك انك تختار صح وحسب الفلوس اللي معاك يعني لو المبلغ مش كبير ماينفعش تدخل بيه مشروع لأن تكلفته عالية ويفضل تشتري بيه دهب أو شهادات ادخار.