لو رايح تحج السنة دي .. خلي بالك من النصابين والتأشيرات المضروبة

 
 
الحج واحدة من الفرائض اللي امرنا بيها ربنا سبحانه وتعالي، لكن مع غلاء اسعار برامج الحج في كل الجهات اللي بتنظمه.. ظهر دلوقتي شركات بتروج للسفر لعمل مناسك الحج بتاشيرات الزيارة والفعاليات وغيرها من التاشيرات السعودية اللي ممكن اي مسافر يدخل بيها السعودية ياتري اية حقيقة الكلام ده.. وسعر التأشيرات دي كام

اتعودنا من زمان ان اي حاجة عليها طلب ممكن يحصل فيها تحايل وتزوير من بعض المحتالين والناس النصابة، وده اللي بيحصل في الحج حاليا خصوصا ان في بعض الناس عموما شركات من الباطن تحت اسماء مختلفة، والنوع ده من الشركات متخصص في اصدار تاشيرات سفر للمواطنين لدخول السعودية لعمل مناسك الحج والعمرة.
طيب اية هيا حكاية التاشيرات دي وازاي الشركات دي بتحصل عليها من السفارة السعودية؟.
علشان نفهم الموضوع لازم نمشي مع بعض واحدة واحدة، اولا شغل الشركات دي قايم علي حاجة واحدة بس اية هيا.. الحاجة دي هي طلب التاشيرة والحصول عليها.. ودي علي فكرة متاحة لاي مواطن.. يعني انت ممكن وانت قاعد في بيتك علي السرير تدخل علي موقع السفارة السعودية او المواقع المتخصصة في اصدار تاشيرات الدخول للسعودية وتطلب الحصول علي تاشيرة لدخول السعودية، وهتاخذها في اقل من 48 ساعة.. ودي متاحة لأي حد.
طيب فين المشكلة بقي... المشكلة هيا ان الشركات دي بعد ما بتطلب التاشيرة للعميل بتقوم بتروح تحجز له رحلة سفر للسعودية علي شرطة طيران اجنبية مش مصرية، واحد هيقولي اشمعني اجنبية وليه مش مصرية.. هقوله علشان اغلب الشركات دي مش بيطبق التعليمات المصرية الخاصة بقانون بوابتي الحج والعمرة.. واللي بتنص علي عدم تسفير المواطنين بدون الحصول علي باركود تعريفي للسفر وكمان يكون معاهم برنامج سفر كامل يعني برنامج مؤكد السفر والعودة وفي حجز فنادق ده غير حجز خدمات حجاج واعاشة في مخيم مني وعرفات.
طيب ده بيحصل ازاي.. السعودية في الفترة الأخيرة قررت منع استقبال او دخول اي مواطن لعمل مناسك الحج بدون تاشيرة حج رسمية حتي المقمين هناك بتمنعوا من الحج الا في حالة الحصول علي تصريح رسمي بعمل المناسك قبل بدء الموسم وبفترة، وهنا الشركات دي بتعلب لعبتها وهيا أنها بتسفر المصريين بتاشيرات مختلفة زي الزيارة وهي اهم تاشيرة الشركات شغالة بيها.. وفي ناس كتير جدا بتسافر بيها، والسفر غالبا بيكون في شهر شوال وقبل بدء موسم الحج خصوصا ان النوع ده من التاشيرات مدته 3 شهور، يعني انت ممكن تسافر بيها تقعد 3 شهور هناك رسمي وبدون اي مشاكل.
النوع ده بقي من الشركات استغل النقطة دي، وحاليا بدوا يسفروا الناس بالتاشيرات دي علي الطيران الاجنبي اللي له خطوط علي المملكة العربية السعودية علشان يدخلوا بغرض الزيارة ويعملوا مناسك العمرة ويهربوا هناك في اي مدينة لحد ما موسم الحج يبدا ويرجعوا يدخلوا في الزحمة مع الحجاج ويعملوا بالمخالفة للقنوانين السعودية والمصرية مناسك الحج.
طيب اسعار النوع ده من التاشيرات كام؟.
اسعار النوع ده من التاشيرات مش محدد بسعر واحد، وماشي بمبدا كل شركة وشطارة صاحبها، بس غالبا هيا اقل من اسعار برامج الحج العادية باكثر من 100 الف جنية، بس المفاجاة هنا ان لو حد اتمسك بيها وهو بيعمل مناسك الحج هياخذ عقوبة ممكن توصل للسجن ده غير منع دخول السعودية لأي سبب لمدة 10 سنين.