عاااش ابن مصر..الخليج كله بيتكلم عنه.. شهامة مصرفي مصري تأثر قلوب أهل الامارات
المصري في كل حتة فدائي وبطل ويفدي بعمره عشان غيره طالما في حاجة للمساعدة وشهامة المصريين مش محتاجة دليل ومعروفة في العالم كله ومن غير مايفكر ولا يعرف جنسية اللي قدامه ولا ديانته ولا غني ولا فقير.
وشهامة المصريين موزعة بالتساوي على الشعب المصري كلها لأنها في جيناته من أيام الفراعنة وبستوي هنا المدير والغفير.. تعالو نشوف إيه اللي حصل في الإمارات في الساعات الأخيرة والمصري اللي بقي حديث الخليج العربي كله.
زي ما احنا عارفين من يوم التلات اللي فات دول الخليج وتحديدا في الإمارات العربية المتحدة وسلطنة عمان بتتعرض لأمطار غزيرة جدا محصلتش من سنين واتسببت طبعا في سيول وفيضانات وشفنا كلنا ازاي الشوارع والأنفاق بقت بحيرات كبيرة ومطار دبي اللي بقي حمام سباحة لكن ربنا سلم ومفيش خساير كتيرة في الأرواح.
نرجع بقي للي حصل في الإمارات الساعات اللي فاتت.. البداية كانت بمقاطع فيديو بتكشف عن شخص بيعوم بسرعة في بحيرة في الشارع وراح أنقذ أسرة إماراتية كاملة من الموت والغرق في عربيتهم والفيديو لما انتشر طلع الشخص دا مصري وكمان مش أي مصر دا مدير في بنك مصر في الإمارات واسمه حازم سويد، وهو رئيس المخاطر التشغيلية ببنك مصر فرع الإمارات، طبعا سويد معملش كده عشان يتصور ويبقي ترند لكن كان كل همه ينقذ خواته من الاماراتيين.
طبعا تصرف المصرفي المصري حازم سويد ممرش مرور الكرام وخد الاف الأوسمة من الإماراتيين والعرب والمصريين على مواقع التواصل الاجتماعي واللي أشادو بشهامته وعلى المستوى الرسمي وبعد ماسمع محمد الأتربي رئيس مجلس إدارة بنك مصر باللي حصل قرر بتكريمه من المركز الرئيسي لبنك مصر بالقاهرة لأن اللي عمله ده وسام فخر على كل العاملين ببنك مصر وفعلا تم التكريم والأتربي اتكلم في المناسبة دي وأكد إن مصر والإمارات قلب واحد ينبض بالأخوة والتقدير، وإن مكانة الإمارات شعبا وقيادة في قلوب المصريين، واللي بيتمنوا السلامة لكل سكان الإمارات شعبا ومقيمين مع الأحوال الجوية السيئة اللي تعرضت ليها البلاد في الفترة الأخيرة.
طبعا العلاقة بين مصر والإمارات مش محتاجة تعليق سواء على مستوي الشعبي أو الحكومي واللي متعرفهوش إن الجالية المصرية في الإمارات من اكتر الجاليات اللي ليها وضع خاص عند الاماراتيين وبيتعاملوا معاك على أنك حاجة كبيرة ومش ناسيين وصية الشيخ زايد الراحل لولاده عن مصر وشعبها
