السبت 25 مايو 2024
رئيس التحرير
عمرو عامر
المشرف العام
عبدالعظيم حشيش
بنك اونلاين

لازم يكون معاك ومن غيره مش هتعرف تستقبل فلوس من بره..يعني إيه هو آيبان الحساب البنكي؟

الثلاثاء 09/أبريل/2024 - 02:01 ص
رقم الآيبان
رقم الآيبان

 


يا ترى ايه هو رقم الآيبان؟ ..  وبنستخدمه في ايه؟ وليه لازم نروح البنك ونجيبه؟ وايه الفرق بينه وبين رقم الحساب؟

رقم الآيبان  هو رقم الحساب البنكي الدولي.. واللي بيعتبر صيغة أو آلية جديدة لرقم الحساب ، وبيساعد فى تسهيل الحوالات البنكية الدولية وسرعة تنفيذها.

يعني رقم الآيبان  ببساطة كدا هو الوسيلة اللى بتخليك تقدر تعمل تحويل من وإلى حسابك البنكي خارج مصر وكمان لو اي حد هيبعتلك فلوس من بره لازم يكون رقم الايبان معاه لأن ده بيفرق في سرعة التحويل وبيقلل فترة وصول الفلوس ليك واستلامها.

ولما تيجي تستقبل أى تحويل مالي لحسابك البنكي او البريدي داخل أو خارج مصر هتكون محتاج الآيبان
طب ايه الفرق بين رقم الحساب البنكي؟ ورقم ايبان الحساب؟ 
ده سؤال مهم جدا وهيوضحلك الصورة أكتر وهيخليك تعرف أهمية وقيمة أن يكون معاك رقم الايبان

بص يا سيدي.. الفرق بين رقم الحساب البنكي أو البريدي ورقم الاييان .. ان رقم الحساب هو  الرقم اللى بتاخده لما تيجي تفتح حساب واللى عن طريقه بتقدر ترسل أو تستقبل أى تحويلات داخلية.. أما رقم الآيبان بيعتبر صيغة لرقم الحساب الدولي واللى بتقدر من خلاله تستقبل أو ترسل التحويلات للخارج

وعلشان يكون عندك رقم الآيبان، فدا ممكن يحصل من خلال كشف الحساب البنكي أو عن طريق خدمة الإنترنت البنكي أو الموبايل البنكي، أو ممكن تحصل عليه لما تتصل بخدمة عملاء البنك..


ورقم الحساب البنكي بيكون ساري وبشكل طبيعي جدًا فى حالة وجود رقم الآيبان.. هو بس رقم الآيبان بيعتبر شكل إلكتروني  لرقم الحساب الشخصي علشان تعمل التحويلات الدولية..
أظن كده حضراتكم عرفتوا بقى الفرق بين الاتنين وعرفتوا كمان ان لو مش معاكم ايبان الحسابات بتاعتكم فلازم تروحوا فورا البنك وتطلبوه من مسئول خدمة العملاء لانه فعلا هيفرق جدا في التحويلات البنكية اللي بتجيلكم من بره مصر وهيقلل زمن وصولها إلى دقايق معدودة