مصير الدولار في ولاية السيسي الجديدة..مين خد باله
حد خد باله من كلام الرئيس السيسي عن الملف الاقتصادي تحديدا في كلمته بعد حلف اليمين في العاصمة الإدارية النهاردة وليه السيسي مجابش سيرة الدولار.. تعالو نعرف الكواليس
العالم كله النهاردة كان بيتابع أول خطاب للرئيس السيسي بعد حلف اليمين وتنصيبه في الولاية الجديدة وده لأن الرئيس السيسي معروف دايما إن خطاباته بيكون فيها رسائل لكل الأطراف وإنه صريح وطبعا العالم كان يهمه يعرف القيادة المصرية بتفكر إزاي في الملفات الصعبة اللي في المنطقة اللي حولينا واللي عاملة زي برميل البارود ممكن ينفجر في اي لحظة.
ولان المصريين عارفين السيسي من ساعة ماكان وزير دفاع وخد ثقتهم من زمان عارفين إن كلامه دايما رؤية لبكرة واللي جاي وعشان كده أغلب المصريين النهاردة ركزوا في كلام السيسي عن ملف الاقتصاد تحديدا لأن ده اللي بيهمهم بشكل أساسي نتيجة الأوضاع الاقتصادية الصعبة اللي مر بيها المصريين السنة اللي فاتت ولان الناس عاوزة تعرف إيه اللي جاي ومصير الأسعار والدولار والتضخم والأسواق والمرتبات وغيرها..
طيب تعالو نشوف الرئيس قال إيه عن الاقتصاد.. شوف ياسيدي السيسي خصص جزء كبير من خطابه عن الاقتصاد وملامح الفترة الجاية ومنها تبنى استراتيجيات تعظم من قدرات وموارد مصر الاقتصادية وتعزيز قدرة الاقتصاد المصرى فى مواجهة الأزمات عن طريق نمو اقتصادي قوى ومستدام ومتوازن وتعزيز دور القطاع الخاص كشريك أساسى فى قيادة التنمية كمان الرئيس أعلن ان الدولة هتزيد التركيز على قطاعات الزراعة، والصناعة، والاتصالات وتكنولوجيا المعلومات.. والسياحة، الاستثمارات المحلية والأجنبية لتوفير الملايين من فرص العمل المستدامة مع إعطاء الأولوية لبرامج التصنيع المحلة لزيادة الصادرات..
لو مشينا ورا كلام الرئيس عن الاقتصاد هنلاقي إنه كله بيقصد بيه توفير الدولار لان أغلب القطاعات الاقتصادية الل قالها الرئيس هي أساسا موارداها بالدولار زي السياحة وقناة السويس والاستثمار والتصدير يعني الدولار محور أساسي في المرحلة اللي جاية في الولاية الجديدة والرئيس عاوز يقول إن فيه خطة نمو مستدام لتوفير الدولار والتدفقات الأجنبية من النقد الأجنبي وده معناه إن فيه خطط شاملة لتوفير الدولار على مدار الولاية الجديدة,
السيسي كما اتكلم عن حاجة مهمة جدا وهي الانضباط المالى وتحقيق الحوكمة السليمة وترشيد الإنفاق العام وتحويل مصر لمركز إقليمى للنقل وتجارة الترانزيت والطاقة الجديدة والمتجددة، والهيدروجين الأخضر ومشتقاته إلى جانب تعظيم الدور الاقتصادى لقناة السويس وده كله بيترجم بردوا لمليارات الدولارات اللي هتدخل البلد وطول مافيه دولارات بتدخل سعر الدولار هينزل قدام الجنيه حسب العرض والطلب.
