تحرك جديد من صندوق النقد.. صفقة الـ 10 مليار دولار تطبخ على نار هادئة
يا ترى ايه آخر تطورات مفاوضات مصر مع صندوق النقد الدولي؟ وهل فعلا الصندوق هيمنح مصر 7 مليار دولار اضافية؟ والطرفين وصلوا لايه فى موضوع تحرير سعر الصرف الجنيه؟ وايه الشروط الجديدة اللى حددها الصندوق لمنح مصر تمويل اضافي؟ وايه علاقة اللى بيحصل بين مصر والصندوق بالعدوان الاسرائيلي على غزة؟
فى الساعات الأخيرة قررت بعثة صندوق النقد الدولي مد زيارتها لمصر حتى نهاية الأسبوع لإجراء محادثات عاجلة حول صفقة محتملة ممكن تتجاوز تمويلاتها 10 مليار دولار.
وتناقش الحكومة زيادة برنامج مصر الحالي مع الصندوق واللى بتبلغ قيمته 3 مليار دولار كجزء من حزمة أوسع ممكن تشمل كمان البنك الدولي ومن المتوقع وصول حجم التمويل الجديد الى حوالى 7 مليار بالاضافة الى ال 3 مليار اللى تم الاتفاق عليهم قبل كده.
طب وهى الحداية بتحدف كتاكيت .. ليه اصلا صندوق النقد هيعمل كده مع مصر؟
طبعا الصندوق مش مؤسسة خيرية وليه أهداف عاوز يحققها من البرامج اللى بيقدمها لأى دولة بس فى حالة مصر الوضع مختلف شوية واللى خلا موقف الصندوق يتغير من التعنت الى التسهيلات هو اللى حصل فى غزة وموقف مصر القوي فى ملف الصراع الفلسططيني الاسرائيلي وتحمل مصر مهام ادخال المساعدات الانسانية ودورها القاعل فى هدنة وقف اطلاق النار وتبادل الرهائن بين الفلسطينيين والاسرائيليين والهم موقفها القوى برفض تهجير أهالى قطاع غزة الى سينا وكل قادة العالم اللى زاروا مصر من بعد 7 اكتوبر وقابلوا الرئيس والمسئولين المصريين نقلوا لحكوماتهم قوة مصر فى المنطقة وده خلا الموقف يتغير 180 درجة
طب هل فيه شروط حددها الصندوق؟
لغاية دلوقتى ما تمش الاعلان عن اى حاجة بشكل رسمي بس التقارير والتسريبات اللى طالعة من كواليس المفاوضات بتقول ان فيه مناقشات بتتم حوالين تحرير سعر الصرف ومفيش اى شروط مجحفة تانية بالعكس فيه تسهيلات وتخفيض لحجم العائد على البرنامج الجديد عشان مساعدة مصر فى القيام بمهامها فى منطقة الشرق الأوسط وتخفيف حدة اللى بيحصل على حدودها
يعنى كده فيه تعويم ؟
بنسبة كبيرة هيكون فيه تحريك لسعر الصرف خلال اللايام الجاية لسد الفجوة بين السعر الرسمي للدولار فى البنك وسعره فى السوق الموازية وكمان عشان الفوضى الموجودة فى سوق الصرف تنتهي
وخفض البنك المركزي قيمة الجنيه 3مرات من أوائل 2022 ولحد دلوقتي وده أدى إلى خسارة نص قيمته مقابل الدولار ورغم أن السعر الرسمي للجنيه استقر عند نحو 30.9 جنيه للدولار من مارس لكن بيتم تداوله بين 65 و70 جنيه في السوق السوداء .
