عالم الانستاباي.. قصة اهم اختراع في 2023 ..مفيش حد هيمسك فلوس في ايده
اكيد طبعا سمعت عن الانستاباي في الفترة الأخيرة لكن اللي متعرفوش إن مصر دخلت مرحلة تانية مختلفة خالص غيرت ولسه هتغير السلوك المالي بتاع المصريين وخلاص زمن المحفظة انتهي ومحدش هيشيل فلوس في جيبه تاني وكل التعامل هيكون تطبيقات إلكترونية لحظية باي مبالغ وانت مكانك وباختصار هي دي فكرة الانستاباي إن كل المعاملات المالية تتم من خلال تطبيق واحد مضمون وأمان وبيشرف عليه البنك المركزي يعني باختصار هيكون في ايدك بنك متحرك تقدر تعمل منه أي معاملة مالية.. ازاي تعالو نشوف الانستاباي عمل إيه في البلد
البنك المركزي المصري أطلق من فترة بسيطة تطبيق انستاباي للمعاملات المالية اللحظية على الهواتف دون الحاجة أنك تروح البنك أو تشيل مبالغ ضخمة في جيبك أو عربيتك ومن خلالها بتسدد كل الفواتير وبتشتري اي حاجة وبتحول فلوس لاي حساب بنكي او محفظة إلكترونية بطريقة سهلة جدا ودا لأن الانستاباي ربط كل الحسابات في البنوك ومحافظ الهواتف واخيرا بطاقات الدفع والمشتريات بنظام واحد..
المهم المركزي أعلن نجاح الانستاباي في مصر بطريقة تفوق الوصف خلال الفترة القليلة دي والمصريين استوعبوه بشكل كبير ولدرجة إن المصريين حولوا أو تعاملوا على تطبيق “انستا باي” للمدفوعات اللحظية بقيمة 130 مليار جنيه منذ إطلاقه في مارس 2022 وحتى نهاية مارس 2023.
وزي ما احنا عارفين إن المنظومة الوطنية للمدفوعات اللحظية (IPN) واللي تم إطلاقها في مارس 2022 هي واحدة من أهم مشروعات البنية التحتية لنظم الدفع اللي بيرعاها البنك المركزي واللى تم تصميمها لتكون بديلا للمدفوعات النقدية ولإتاحة كافة خدمات التحويلات للعملاء لحظيا طوال أيام الأسبوع.
وكشف البنك المركزي إن عدد حسابات محافظ الهاتف المحمول وصل إلى 32 مليون حساب بنهاية مارس 2023 ووصل إجمالي عدد العمليات اللى تمت خلال مارس 2023 حوالي 71 مليون عملية بقيمة تقدر بنحو 90 مليار جنيه.
وحسب البنك المركزي تم نشر 700 ألف رمز استجابة سريع QR code طلب دفع للتحصيل الإلكتروني مستخدم في محفظة الهاتف المحمول سواء من خلال الانترنت أو من خلال الانترنت أو من خلال المحال التجارية وذلك حتى نهاية مارس 2023... يعني باختصار كده مصر كلها هتتدفع من الموبايل وخلاص زمن الطوابير في البنوك انتهي ومش هتخاف تشيل اي مبلغ لانك تقدر تحوله في دقيقة واحدة بالموبايل وطبعا العالم المتقدم كله ماشي بقصة الدفع الالكتروني دي وبيعتمد عليها الاقتصاد الحديث والاستثمار يعني كان لازم الانستاباي يظهر في حياتنا.
