مصر محتاجة كام مليار دولار عشان تحل أزمة نقص العملة الأجنبية؟

 
يا ترى مصر محتاجة سيولة قد إيه عشان تعرف تحل أزمة نقص العملة الأجنبية؟ وهل عندها المواد اللى تقدر تجمع من خلالها المبلغ المطلوب؟ وايه اللى ممكن يحصل للسوق السودا لو الحكومة نجحت فى جمع المبلغ المطلوب؟ وايه الوضع فى مصر بعد انتخابات الرئاسة؟ وهل ملف الطروحات الحكومية ممكن يغطى الفجوة التمويلية اللى بتعانى منها مصر من مارس 2022 ولحد دلوقتي؟ 
 

 
كلنا عارفين ان مصر بقالها فترة بتعانى من شح واضح فى العملة الأجنبية نتج عنه ارتفاع كبير وقياسي في سعر الدولار فى السوق السودا وده اتسبب فى مشاكل كبيرة جدا للاقتصاد المصري وكان ليه تأثير سلبي كبير على حياة الناس فى مصر بسبب الارتفاع الجنوني لأسعار السلع خصوصا ان مصر بتستورد غالبية احتياجاتها من الخارج واستيراد يعنى دولار.. وكل ما الطلب زاد على الدولار كل ما سعره زاد فى السوق السودا وكل ما الفجوة فى الموازنة بتزيد وكل ما خدمة الديون وفوائدها وأقساطها بتزيد.
طب مصر محتاج كام مليار دولار عشان تحل أزمة نقص العملة الأجنبية؟
وفقا لتقرير سابق لمجموعة "إي إف جي هيرميس" مصر محتاجة سيولة أجنبية بتترواح ما بين 8 إلى 10 مليار دولار لمواجهة أزمة نقص العملة الأجنبية.. وخد بالك ده رقم مش قليل خالص لكنه فى نفس الوقت مش صعب وبالتحركات اللى بتعملها الحكومة فى الفترة الأخيرة والفلوس المتوقع دخولها مصر سواء من خلال الاستثمارات الأجنبية المباشرة أو من خلال ملف الطروحات الحكومية وبيع بعض الأصول المملوكة للدولة لصناديق استثمار عربية وأجنبية.

يعنى الحكومة معتمدة على الاستثمار الجنبي وبيع الأصول بس؟ 
لأ طبعا مصر بتتحرك فى أكتر من اتجاه لسد الفجوة التمويلية سواء من خلال مؤسسات تمويل زي صندوق النقد الدولي وفى الملف ده حصلت انفراجة كبيرة جدا ومديرة الصندوق بنفسها طلعت وأعلنت كامل الدعم للحكومة المصرية فى مواجهة التحديات الاقتصادية الصعبة اللى بتواجهها وقالت ان تعويم الجنيه مش أولوية خالص دلوقتى بالنسبة للصندوق وان الأهم مواجهة التضخم والحفاظ على استقرار مصر 
كمان الاتحاد الاوربي اعلن عن منح مصر مبلغ حوالى 10 مليار دولار فى اطار توسيع التعاون مع القاهرة فى ملفات مهمة زي الطاقة ومنع الهجرة غير الشرعية وغيرها من الملفات ذات الاهتمام المشترك.

طب ايه تاثير تحركات الحكومة على السوق السودا للعملة ؟ 
فيه تاثير ايجابي واضح وفى الأيام اللى فاتت سعر الدولار فى السوق السودا خسر كتير من المكاسب اللى حققها وفقد حوالى من 8 الى 10 جنيه وبعد ما كان وصل الى مستوى ال 50 جنيه حاليا بيتباع فى حدود ما بين 40 و42 جنيه ومتوقع هبوط أكتر لسعر الدولار فى السوق الموازية فى وقت بيشهد فيه سعر العملة الأمريكية فى البنوك استقرار واضح عند حدود 31 جنيه من نهاية الربع الأول من 2023.