كلام مهم جدًا عن قانون التصالح في الفيديو دا.. المتر بكام؟؟ وموقف من رفض تصالحهم
في تساؤلات كتير اوي بتجيلنا عن قانون التصالح.. وعن حالات وشروط التصالح.. والمبلغ اللي هايندفع للتصالح وغيرها من الأمور.. ودا هانوضحه النهادرة
طبعًا من أسابيع نشرنا هنا تفاصيل موافقة اللجنة المشتركة بين لجنة الإدارة المحلية واللجنة التشريعية بمجلس النواب على تعديلات قانون التصالح على مخالفات البناء.
مبدئيًا كدا.. القانون دا ألغى قانون 17 لسنة 2017.. واللي المشرع شاف إن في عورات كتير ولازم يتعدل.. ودا اللي حصل فعلًا.. وبموجب القانون الجديد ف سعر المتر للتصالح على مخالفات البناء هيتراوح من 50 لـ 2500 جنيه حسب الموقع والمرافق.. يعني حسب أنت عايش في الريف ولا المدينة.
واللي عايزين يقدموا طلبات تصالح فدا مسموح للمواطنين من وقت صدور اللائحة التنفيذية.. واللي يحق ليهم التقدم بالطلبات هما اللي بنو من مخالف قبل إصدار القانون.. وفترة التصالح مفتوحة لمدة 6 شهور وبحد أقصى 3 سنين.
وبموجب القانون الجديد فهو أجاز حاجات كتير منها إمكانية التصالح على زيادة الارتفاعات وتجاوز خطوط التنظيم.. وإمكانية البناء خارج الحيز العمراني. وكل دا تقدر تقدم فيه طلبات تصالح.
وبالنسبة للمساحات اللي هايتم التصالح عنها لو كانت لغاية 200 متر والمبنى بحد أقصى 3 أدوار.. فأنت بقى مش محتاج متخصصين ولجنة فنية والقصة دي كلها اللي كانت في القانون القديم.. لأ دا أنت بتطلع تقرير من مهندس استشاري من الحي أو المكان بس يكون معتمد.
وبالنسبة للناس اللي سبق واترفض تصالحهم وفقًا للقانون القديم.. فالقانون الجديد بيسمح ليهم أنهم يقدموا طلب جديد للجنة البت والتظلمات..يعني تقدر تقدم ذات الطلب دون رسوم جديدة.
وكمان لو أنت كنت تميت التصالح على الأعمدة ف تقدر برضوا تستكمل البناء من غير طلبات جديدة.
