طار في السما.. ايه اللي بيحصل في الصاغة وليه الدهب ولع

ايه اللي بيحصل في سوق الدهب النهاردة وليه الأسعار رجعت تولع تاني وإيه الأسباب والمعدن الأصفر رايح على فين.. ومين بيلعب في السوق..  وايه انسب وقت للبيع والشراء 
 

كلنا ملاحظين ارتفاع أسعار الدهب على مدار الأيام اللي فاتت ووصلت لأرقام كبيرة ولسه بيزيد والنهاردة ارتفع سعر الدهب في الأسواق المحلية بحلول منتصف تعاملات الاثنين 20 نوفمبر 2023، بعد حالة من الاستقرار النسبي ووصل سعر الذهب عيار 24 بمنتصف التعاملات بحوالي 17 جنيه ووصل  3150 جنيه.

وزاد سعر الدهب عيار 21 حوالي 15 جنيه مرة واحدة، وارتفع  لحوالي 2760 جنيه بالمصنعية والدهب عيار 18 زاد سعره حوالي 23 جنيه ووصل  2360 جنيها وسجل سعر الجنيه الدهب في منتصف التعاملات 21880 جنيه.. طيب ياترى ايه أسباب الارتفاع.. شوف حضرتك في كل العالم الدهب ماشي عكسي مع الدولار إلا في مصر الدهب بيطير مع الدولار وبينزل معاه وطبعا تجار الصاغة بيسعروا الدهب بسعر دولار السوق السودا وتقريبا عند 52 جنيه وعشان كده الدهب سعره بيزيد وهيفضل يزيد طالما الدولار بيطلع.
وفيه أسباب تانية لارتفاع سعر الدهب خلال الفترة الحالية وهو اختلال العرض والطلب وحبس تجار الصاغة للدهب وتقليل المعروض لرفع السعر وكلنا عارفين إن الدولة جددت مبادرة دخول الدهب مع المصريين بالخارج ودا ساهم في زيادة تدفق المعدن الأصفر بحوالي 3 طن و300 كيلو حسب أخر البيانات ودا كان سبب في انخفاض سعره قبل الأسعار ما ترجع ترفع تاني ودا بيأكد إن التجار سبب رئيسي في رفع الأسعار.

في نفس الوقت فيه إشاعة بتقول إن سعر الدهب بيزيد في نهاية كل سنة عشان مواسم الاقبال على الشراء والمناسبات الاجتماعية ودي إشاعة غير صحيحة بحسب تأكيد خبراء الدهب ومسئولي الشعبة  واللي أكدوا العكس وهي إن أسعار الدهب بتنزل مع نهاية السنة نظرا لتراجع الطلب عليه، ودا اللي بيحصل في  العادي.

طيب امتي الدهب ينزل.. طبيعي لما الدولار سعره ينزل في السوق السودا ولما التجار يبطلوا جشع ولما المعروض يرجع يزيد تاني واللي بيستثمر في الدهب دا أحسن وقت تبيع فيه عشان تستفاد من الأسعار العالية لكن نصيحة متشتريش دلوقتي غير لما الأسعار تنزل.