عش الوطواط.. لو ساكن جمب جبل هتبقى مليونير في لمح البصر

عمرك اتخيلت إنك تبقي مليونير في أقل من ساعة، ومن مصدر شرعي وحلال بس كل اللي ناقصك شوية حظ ومعرفة بالحاجات الغالية واللي بتتباع بالدولار جمب بيتك وانت متعرفش.

عش الوطواط أو الخفاش قادر يخليك مليونير في لمح البصر، وزاد البحث عنه بسبب انتشار كلام على فوايده الكبيرة واستخداماته لدرجة إن سعره وصل عروض إلى 10 ملايين دولار على مواقع التواصل الاجتماعي.

والبحث عن عش الخفاش بقي هوس عند الشباب الباحثين وراء الثراء السريع .
طيب ايه فوايد عش الوطواط أو الخفاش.. شوف حضرتك مفيش حد جزم بشكل علمي بفوائد عش الوطواط لكن الكلام المنشور على مواقع التواصل بيقول إن عش الخفاش له فوايد كبيرة وبداخله كنوز ثمينة منها إنه فيه مواد بتعالج الجلطات ومواد لعلاج السرطان وأمراض تانية.

وإن عش الوطواط فيه أحجار كريمة ومن بين الحاجات اللي اتقالت إن عش الخفاش موجود فيه سائل الزئبق الأحمر واللي بيستخدم في استخراج الأثار من باطن الارض.

وفيه كلام إن عش الخافش فيه مواد هلامية بتستخدم في أعمال السحر والشعوذة.

بالبحث طبعا زي ما قلنا اكتشفنا إنه مفيش أبحاث علمية دقيقة بتشير إلى أن عش الخفاش أو الوطواط له فوائد علمية أو طبية، إلا أن هناك بحث أسترالي، ذكر أن أنزيمات الخفاش من الممكن أن تعالج بعض الأمراض، ولا أحد يعلم حقيقة نشر شائعة عش الخفاش، كما ذكرت حماية الطبيعة أن الخفاش لا يكون عشا ولكنه يوجد معلق بالمكان اللي بيسكن فيه وبيكون غالبا في الغابات المهجوة وكهوف الجبال والأشجار المرتفعة جدا.

المثير للسخرية إن فيه انتشار كبير عن اختبار العش الحقيقي للوطواط من المزيف بواسطة الثوم.. وحسب الفيدوهات المنتشرة يقوم الشخص بتمرير الثوم بجوار عش الخفاش وفى حالة تحرك العش يمينا ويسارا فدا معناه إن عش الخفاش سليم وغير مقلد، وإذا ثبت العش ولم يتحرك فبكده يبقى مزيف مصنوع من الطين.