إسرائيل على وشك الإفلاس.. توقف كل قطاعات الاقتصاد والشركات العالمية تهرب وفاتورة الحرب فوق قدرتها المالية

 
في الاستثمار مفيش عواطف ولا لوبي ولا معلش وقالوا راس المال جبان ومع تصاعد العنف في دولة الكيان هربت عشرات الشركات الناشئة وطبعا اتقفل الباب على أي شركات تانية أو مستثمر ودا طبعا جمب اغلاق شركات عالمية لفروعها في أسواق الكيان المحتل وكل المؤشرات بتقول انها داخلة على. كارثة اقتصادية مع تكاليف الحرب الباهظة واستدعاء الاحتياطي اللي هو بيكون من الشريحة العاملة في الدولة لأن عدد سكانها قليل وضيف عليهم محاصرتها من الأعداء من كل الحدود ورعب الجبهة اللبنانية، وفيه خبراء ما استبعدوش احتمالية إفلاس دولة الاحتلال مع بودار اتساع الصراع وطول مدته والعواقب والرد المقابل من الجانب الفلسطيني لأن العنف بيولد العنف.

عمر دولة الاحتلال مكانا قريبة من الانهيار زي دلوقتي ولو هنحسبها اقتصاديا الاستثمار تلقى رصاصة الرحمة ووقف تماما وشركات عالمية وقفت ومفيش طبعا سياحة ولا صناعة مع الصواريخ والعنف وعمال السركات والتوكيلات العالمية قاعدين في الملاجيء تحت الأرض والبورصة زي ما شفنا انهارت وخسرت 20 مليار دولار في أول كام ساعة .. فعشان كده بنقول أن الإفلاس وارد لو استمرت الحرب فترة طويلة ودا غالبا اللي هيحصل.
والنهاردة أغلقت العديد من الشركات العالمية اللي ليها تواجد في دولة الاحتلال  عملياتها  وطلبت من موظفيها العمل من منازلهم بسبب الاشتباكات العسكرية بين الإسرائيليين والفلسطينيين كمان كتير من شركات الطيران الأميركية والآسيوية والأوروبية علقت رحلاتها المباشرة إلى تل أبيب لأجل غير مسمى ودي طبعا خساير بالملايين

كمان شركات النفط قررت توقف نشاطها وقال متحدث باسم شركة "شيفرون"  أكبر منتج للنفط والغاز في الولايات المتحدة، تلقت تعليمات بإغلاق حقل "تمار" للغاز الطبيعي قبالة الساحل الشمالي للبلاد ودي حرمت دولة الاحتلال من عشرات الملايين من الدولارات كل يوم وشفنا ازاي المركزي الإسرائيلي امبارح أعلن بيع من 30الى50 مليار دولار لدعم العملة الإسرائيلية اللي بتنهار.

كمان عدد من البنوك العالمية واللي ليها فروع في دولة الاحتلال قفلت زي البنك الأميركي جي بي مورجان تشيس واللي طلب من 200 موظف في إسرائيل العمل من المنزل بالاضافة لالغاء كل الفعاليات الاقتصادية العالمية اللي كان مقرر ليها في دولة الاحتلال واعلنت أكبر شركة لتصنيع الرقائق المستخدمة في الذكاء الاصطناعي والرسومات الحاسوبية في العالم "إنفيديا" إلغاء قمة الذكاء الاصطناعي المقرر عقدها في تل أبيب الأسبوع الجاي.