مدبولي يعلن عن صفقة العمر مع ميرسك.. ب3 مليار دولار وضربة للممرات البديلة
من ساعات عرضنا في بانكير عم بداية تنفيذ مشروع ضخم لإنشاء محطة حاويات جديدة نابعة لشركة قناة السويس للحاويات وهي شركة فيها شركاء أجانب من عمالقة التجارة والنقل البحري وقلنا إن تكلفة المشروع نص مليار دولار أو 500 مليون دولار وإن المشروع ضمن نطاق منطقة قناة الاقتصادية.. ايه الجديد اللي بيحصل في منطقة السويس تحديدا وهل صحيح كل المليارات دي رايحة تستثمر وايه حكايه مشروع القرن اللي وقعه مدبولي من شوية في نفس المنطقة.
في الحقيقة ناس كتير ماصدقتش لما أطلقنا على اقتصادية قناة السويس هنا في بانكير سنغافورة افريقيا وقالوا إننا بنبالغ جدا وسنغافورة فين والسويس فين، لكن زي ما سنغافورة وماليزيا وهونج كونج وكل النمور اللي ظهرت كانت بداياتها زي منطقة قناة السويس صناعات واستثمارات وقبلهم بنية تحتية قوية ، ومش هنبالغ لو قلنا إن المنطقة الاقتصادية في قناة السويس هتعدي سنغافورة وهتكون بمثابة كنز مالي لمصر وكمان بالعملة الصعبة
نظرة خاطفة للاستثمار الأجنبي في منطقة قناة السويس الاقتصادية هتلاقي إن فيه استثمارات بحوالي 16 مليار دولار للهند والصين و كمان حوالي 7 مليار دولار لروسيا وأغلبهم في استثمارات في الطاقة النظيفة ووسائل النقل الجماعي والسيارات والصناعات التكنولوجية يعني بنتكلم عن 23 مليار دولار استثمارات مباشرة أو اتفاقيات لمشروعات من 3 دول فقط ولسه باقي الاستثمارات الأجنبية الخليجية والأوروبية بالمنطقة وكمان لسه قايلين امبارح أن فيه هجوم استثماري ياباني على منطقة قناة السويس وزار وفد كبير يضم حوالي 24 شركة للمنطقة عشان يشوف الفرص الاستثمارية.
الجديد بقى النهاردة مصر وقعت صفقة العمر في إقتصادية قناة السويس واللي وصلت 3 مليار دولار مرة واحدة.. تعالوا نشوف التفاصيل.
مجلس الوزراء كشف نهاردة عن توقيع مصر وشركة "سي تو إكس" (C2X) التابعة لشركة شحن الحاويات العالمية "ميرسك"، اتفاقية إطارية جديدة بقيمة تصل إلى 3 مليارات دولار لإنتاج الوقود الأخضر ومشتقاته في المنطقة الاقتصادية لقناة السويس، بحسب بيان صادر عن مكتب رئيس مجلس الوزراء المصري اليوم
الاتفاقية وحسب التفاصيل بتهدف إلى استثمار 3 مليار دولار كمرحلة من مشروع إنتاج الوقود الأخضر لإمدادات تموين السفن والوصول بالانبعاثات الكربونية إلى الصفر، ..ووقع الاتفاقية عن الجانب المصري كل من الهيئة العامة للمنطقة الاقتصادية لقناة السويس، وصندوق مصر السيادي، وهيئة تنمية واستخدام الطاقة الجديدة والمتجددة، والشركة المصرية لنقل وتوزيع الكهرباء.
و المرحلة الأولى من المشروع بتهدف إنتاج 300 ألف طن سنوياً من الميثانول الأخضر، والوصول إلى مليون طن سنوياً باكتمال مراحل المشروع النهائية.. رئيس الوزراء مصطفى مدبولي، اللي حضر حفل التوقيع، قال إن مصر هتواصل العمل على التوسع في مجال الطاقة النظيفة لإنتاج الهيدروجين الأخضر ومشتقاته، حيث تعمل على تنفيذ مشروعات لإنتاج واستخدام الميثانول الأخضر والأمونيا الخضراء، وذلك في سبيل خدمة قطاع تموين السفن على الأخص.
اتفاقية ال3 مليار دولار مع ميرسك هي الاتفاقية الإطارية العاشرة ضمن مذكرات التفاهم التي وقعتها المنطقة الاقتصادية، بحسب جمال الدين، وتأتي بعد توقيع مصر مذكرة تفاهم مع عملاق النقل البحري العالمي في مارس الماضي.
وحسب الخطط المصرية بتستهدف المنطقة الاقتصادية التحول إلى الاقتصاد الأخضر وتطبيقاته الصناعية المختلفة، زي صناعة الوقود الأخضر، اللي يعد أحد أهم مصادر الطاقة النظيفة عالمياً... ورغم ضخامة الصفقة اللي بتساوي قيمة قرض صندوق النقد الدولي اللي مغلبنا معاه لكن للصفقة وجه آخر مهم جدا وهي تأكيد الثقة في منطقة قناة السويس واللي بتستمد أهميتها طبعا من قناة السويس أهم ممر بحري تجاري في العالم ومفيش ممر بديل يقدر ياخد مكانها مهما كان بدليل حجم الاستثمارات الضخمة في المنطقة
