لو التعويم النهاردة!.. تعمل ايه عشان تعرف تعيش وتحافظ على مدخراتك؟
أكتر حاجة شاغلة الناس فى مصر فى الكام يوم اللى فاتوا هو التعويم الجديد امتى؟ وايه قيمة التخفيض اللي هيحصل فى الجنيه؟.. اللى عاوز يشترى عربية قاعد وحاطط ايده على قلبه ان الاسعار تزيد واللى نفسه فى شقة خايف الفلوس اللى معاه قيمتها تقل وميعرفش يجيب الشقة اللى نفسه فيها.. واللى هيتجوز قاعد يحسبها وخايف المصاريف تزيد ويرجع يلف فى نفس الدايرة من تاني.. فيا ترى لو حصل تعويم النهاردة او بكره أو فى اي يوم تانى تعمل ايه عشان تحافظ على قيمة فلوسك ؟ وايه اللى هيحصل لأسعار السلع فى السوق؟ وايه السلع اللى لازم تشتريها من دلوقتي عشان تجهز نفسك لما بعد التعويم؟
معظم التقارير اللى طالعة من مؤسسات التمويل الدولية بتقول ان فيه تعويم جديد للجنيه المصري، صحيح مفيش اتفاق على موعد محدد لده لكن كل الكلام ان تخفيض قيمة العملة المصرية هيحصل يعنى هيحصل والحكاية كلها مسألة وقت مش أكتر وده رغم ان سعر الدولار فى البنوك وشركات الصرافة المعتمدة من البنك المركزي ثابت ومستقر بقاله فترة طويلة وحتى سعر الدولار فى السوق السودا بيتراجع فى الأيام الأخيرة.. بس يا ترى لو حصل تعويم المفروض حضرتك تعمل ايه وازاى تحافظ على قيمة مدخراتك.
زي ما احنا متابعين واتكلمنا هنا كتير عن قصة التعويم وهل فيه قرار قريب ولا لأ وقلنا على مؤشرات ممكن تكون تمهيد لتعويم قادم لكن امتى التعويم يبقي خطر وامتى يبقى إجراء مجبرة عليه الحكومة وامتى يبقى مطلوب ومفيش منه خوف.. شوف حضرتك التعويم هيبقى خطر وكارثي لو حصل النهاردة أو بكرة بمعنى انه يحصل دلوقتي قبل ما يكون فيه حصيلة دولار كبيرة في البنك المركزي والبنوك الحكومية تلبي احتياجات الدولة والشركات والمستوردين وتضبط بيها حدود أسعار الصرف مع السوق السودا لأن التعويم من غير احتياطي كبير من العملة المريكية هيقفز بالاسعار لمستويات يعجز قصادها المواطن على شراء احتياجاته مع التضخم الكبير اللي هيحصل وقتها ودا إجراء مش مطروح دلوقتي وسبق والرئيس السيسي رفضه بشكل قاطع.
طيب امتى يكون التعويم إجراء لامفر منه .. الحكومة هتعمل كده بس هيكون عندها احتياطي بس مش كبير من الدولار وساعتها هتتعامل مع خطة زمنية لتوفير الدولار بشكل مايسمحش بارتفاع الأسعار وممكن تاخد الخطوة دي عشان تعدي من مطب قرض صندوق النقد الدولي ومن تقارير وكالات التصنيف الدولية لأن تقاريرهم مهمة جداً لجذب الاستثمارات وتقييم مستقبل الاقتصاد المصري
ولازم تكون عارف إن أي تقارير سلبية من الجهات دي معناها الاقتصاد هيعاني من شح الاستثمارات الأجنبية والمباشرة وهيزعزع الثقة في نفوس المستثمرين اللي جوه البلد وهتتأثر معدلات النمو والقدرة على تجاوز الأزمات.
طب حضرتك كمواطن ازاى تحمي نفسك وتأمن مدخراتك من أى تعويم محتمل ؟
فيه كام حاجة لازم تعملها فورا لو خايف من تخفيض قيمة الجنيه أولها انك لو معاك فلوس ومش محتاجها لفترة طويلة على الاقل سنة لازم تشترى دهب وتضمن بيه المحافظة على قيمة فلوسك وزيادتها لو التضخم استمر فى الارتفاع ومسزة الدهب ان سهل تسيل فلوسك فى اى وقت لو اتزنقت ده بالاضافة الى انه استثمار آمن ومضمون ومع الدهب فيه كمان العقارات واحنا عارفين فى مصر مفيش عقار بيخسر صحيح ممكن اعادة البيع تكون بتاخد وقت عكس الدهب لكن فى النهاية العقارات استثمار مربح وبيحافظ على قيمة الفلوس وارباحه بتعوض اى ارتفاع فى التضخم
ده بالنسبة للناس اللى معاه فلوس عاوزة تحافظ عليها.. طب بالنسبة للى عاوز يمشي حياته؟
بصي يا سيدى لو عاوز تشترى اى اجهزة كهربائية او سلع معمرة روح اشتريها فورا وما تستناش لبكرة لأن الأسعار كل يوم بتزيد بس يفضل انك تشترى اللى انت عاوزه بالتقسيط وعلى مدد زمنية طويلة لأن القسط قيمته هتكون ثابتة ولو حصل تخفيض للجنيه السلعة هتزيد وانت هتاخدها يسعر رخيص وعلى فترة زمنية أطول
