مخابرات ورشاوي بملايين الدولارات.. ليلة سقوط الجنيه

عمرك سألت نفسك ليه تقارير المؤسسات الدولية عن مستقبل الجنيه المصري ما بتطلعش ولا تكتر الا لما يحصل هزة فى السوق السودا للدولار؟، طب هل المؤسسات اللى بتطلع التقارير وطول الوقت بتتكلم عن انهيار العملة المصرية عاوزة مصلحة البلد أو بتتمنى اقتصادها ينهض وينمو من جديد؟، طب ازاى والدولار بيتراجع بشكل ملحوظ فى السوق السودا كل التقارير طالعة تقول ان مصر مضطرة تعمل تخفيض فى قيمة الجنيه؟ واشمعنا التركيز كله حاليا على مستقبل العملة المصرية قدام العملات الأجنبية؟ وايه علاقة كل ده بالأصول اللى مصر أعلنت عن بيعها خلال الشهور الجاية؟ وهل فيه أي ربط بين اللى بيحصل وبين الانتخابات الرئاسية الجاية؟ والأهم هو ايه علاقة الرئيس عبدالفتاح السيسي بالموضوع؟ 
كل الأسئلة دي وغيرها كتير هنحاول نجاوب عليها لحضراتكم .
 
اوعا تفتكر ان مؤسسات التصنيف الدولية ومراكز الأبحاث جمعيات خيرية غير هادفة للربح أو مؤسسات عاوزة تساعدك عشان تقف على رجليك من جديد وتعدي الأيام الصعبة اللى بيعيشها العالم كله من بعد الحرب الروسية الاوكرانية ولحد دلوقتي، واوعا تصدق كل حاجة بتيجي فى التقارير بتاعت المؤسسات دي عن الوضع الاقتصادي في مصر واللي كلها غالبا بتكون مليان سواد وتوقعات سلبية عن مستقبل الجنيه وحجم الاستثمارات الأجنبية وغيرها من الملفات.
طب ليه بنقول كده ؟ 
بص حضرتك مؤسسات التصنيف ومراكز الأبحاث دي فيها موظفين وباحصين بالمئات وعندها مصاريف بتتخطى سنويا مئات الملايين من الدولارات ومحدش يعرف تحديدا المؤسسات دي بتجيب فلوسها منين ولا مين اللى بيمولها وعشان كده اى تقرير يطلع عن اى دولة مش مصر بس فتش وراه واعرف مين المستفيد منه هتعرف الوكالات دي بتشتغل لصالح مين
حد هيسال ويقول .. ويعنى هى الوكالات دي بتفترى على مصر ما الوضع الاقتصادي صعب وكلنا حاسين بيه ؟ 
طبعا معاك حق فى اللي بتقولوا احنا بنمر بظروف اقتصادية طاحنة مش صعبة والاسعار بقت نار وفيه أزمة كبيرة فى العملة مأثرة على اسعار كل السلع اللى بنستوردها كل ده تمام وحقيقي، بس خد بالك مش مصر بس اللى بتعيش الظروف دي فيه دول كبيرة ومهمة واقتصاداتها أقوى من مصر بعشرات المرات وشعوبها بتعانى وبتشتكي من ارتفاع تكاليف المعيشة لكن ما بنشفش تقارير بتطلع تقول ان علمتها هتنهار او ان اقتصادها رايح فى سكة اللى يروح ما يرجعش

امال ايه اللى بتكسبوا وكالات التصنيف ومراكز الأبحاث عن تقاريرها ضد مصر؟ 
ده سؤال مهم وخطير واجابته هتقولك وتفسرلك سر الهجمة الشرسة على الجنيه المصري فى الكام يوم الأخيرة.. بص يا سيدي مصر اعلنت من فبراير اللى فات عن برنامج الطروحات الحكومية والبرنامج ده ببساطة بيعنى ان مصر هتبيع بعض من اصولها فى شركات كبيرة وناجحة عشان تسد الفجوة التمويلية الموجودة فى الموازنة العامة وتوفر السيولة الدولارية لسد احتياجاتها وسداد التزاماتها الخارجية وفيه دول كتير طمعانة انها تاخد الشركات دي وتشترى اسهمها بتراب الفلوس وكل ما قيمة الجنيه بتنخفض الدول دي بتحقق مكاسب حتى من قبل ما تشترى اى حاجة، وعشان كده هتلاقي أجهزة مخابرات أجنبية وأنظمة حاكمة بتنشط بقوة فى سوق وكالات التصنيف وممكن تدفع الغالى والنفيس فى تقرير يشعلل السوق السودا للدولار ويزيد من نزيف الجنيه ووقتها تدخل تشترى الشركات اللى هي عاوزاها وبقيمة أقل من قيمتها بكتير
وايه دليلك على الكلام ده ؟ 
ده برضوا سؤال مهم .. من شهر مارس اللى فات وسعر الدولار فى البنوك مستقر عند مستويات 31 جنيه والدولة بالتعاون والتنسيق مع البنك المركزي بتوفر العملة الصعبة للمستوردين والشركات وفى الكام شهر اللى فاتوا الحكومة افرجت عن بضايع كانت محتجزة فى الموانيء بحوالى 35 مليار دولار.. وكل ده عمل وفرة فى العملة الصعبة وقلل الطلب على الدولار.. كمان انضمام مصر لتحالف بريكس كان ضربة قاتلة للمضاربين واصاب السوق السودا بالشلل وفى الاسبوع الاخير حصل تراجع كبير للدولار وسعره فى السوق الموازية نزل من 41 الى مستويات بين 36 و38 جنيه.. والغريبة ان التقارير عن خفض قيمة الجنيه ما بدأتش تطلع غير لما الانهيار بدا يحصل فى السوق السودا للدولار.. هل ده ما بيقولش اى حاجة  
أيوه يعنى ..هو الجنيه بسم الله ما شاء الله شادد حيله ومكسر الدنيا؟ 
لا طبعا الجنيه بيعانى وبيواجه ضغوط زيه زي عملات كل الدول الناشئة بس رغم كده التقرير بشهادة وكالة زي وكالة فيتش مقيم بأقل من سعره بحوالى 12% فازاى التضارب ده حاصل يعنى الوكالة بتقول ان الجنيه هيخسر 20 % من قيمته وفى نفس الوقت شايفة انه مقيم بأقل من سعره.

وبالمناسبة الجنية بشهادة رئيس الوزراء الدكتور مصطفى مدبولي مقيم بأقل من سعره بسبب أزمة نقص العملة واول ما يحصل توفير للسيولة من النقد الأجنبي الجنيه هيستعيد قوته

طب وايه علاقة انتخابات الرئاسة بالتقارير اللى بتطلع كل شوية عن الجنيه ؟
انتخابات الرئاسة خلاص على الابواب ولحد اللحظة اللى بنتكلم فيها مع حضراتكم فالرئيس السيسي هو المرشح الاوفر حظا فى الانتخابات دي والمؤسسات الدولية واجهزة مخابرات فى كتير من الدول عارفة ومتأكدة ان الرئيس هيكسب الانتخابات بسهولة بسبب كتير من الانجازات اللى حصلت فى مصر الفترة الأخيرة وكمان لعدم وجود منافس قوي قدامه فلما سعر الدولار فى السوق السودا هيرتفع والاسعار تزيد ده هيعمل حالة غضب شعبي وهيزيد من أعباء المصريين وده ممكن يحرج الرئيس قبل الاستحقاق الانتخابي فعشان كده الحرب والهجمة الشرسة على مصر هتزيد الأيام الجاية وهنشوف كل شوية تقارير كلها بتتكلم عن تراجع الجنيه وعن معاناة الاقتصاد وعن ارتفاع التضخم