15كبسولة اقتصادية هامة للتوفير بمناسبة المدارس هتحافظ على الميزانية
نشرت صفحة الخبير الاقتصادي الدكتور أحمد حنفي خمسة عشر كبسولة اقتصادية للحفاظ على ميزانية الأسرة خاصه في ظل الأزمة المالية التي يتعرض لها العالم.
وتأتي الخمسة عشر الكبسولة على النحو التالي.
١_ علمى ولادك يطفوا نور الاوضة اللى خرجوا منها ومعاها التكيف
٢_ شواحن فى الفيش بدون استخدام تتشال
٣_ مش نشترى هدوم إلا واحنا متأكدين من مقاساتها، بحيث لو طلعت كبيرة هيتعطل لبسها، ولو صغيرة هتبيعيها بخسارة أو هتتحول لكراكيب.
٤_ الاكل نعملة على قد الاستخدام لأفراد الأسرة، بحيث ما يتبقاش منه حاجة، وبالتالي ما يتعرضش للهدر والرمي.
٥_ التخزين والتفريز مهم والصفحة مليانه افكار تفريز كتير
٦_ فى وجبات اقتصادية ومفيدة هنزلها زى ( البلح العجوة بالسمن البلدى أو الزبدة معاهم السمسم ويتعملوا سندوتشات _ البليلة باللبن تحفة .... المربات اللى نعملها ف البيت تين او فراولة .... الخ ) وهتكلم عن الاكلات دى بالتفصيل
٧_ لما نيجى نغسل الغسيل نجمعة ونصنف ألوانه وخاماته، بحيث تقدري ياست الكل تعملي دورات غسيل متكاملة، لإن ده هيوفر عليكي في الكهربا.... ولو ده مش متوفر، عااادى تجيبي مناديل حماية الألوان من البهتان، وتحطي ألوان كتير مع بعض.
٨_ وفري فى التنقلات سواء بتستخدمي عربية أو أوبر، جمعي احتياجاتك مرة واحدة في أماكن قريبة.
٩_ أفراد الأسرة ينسقوا مع بعض مشاويرهم، لإن ممكن يكونوا اتنين رايحين مكانين قريبين جدًا، ومع كده كل واحد واخد أوبر لوحده.
١٠_ لو لقيت عجلة مستعملة لابنك اشتريها مش هتخسر دى هتوفر ورياضة وهيقضى بيها مشاوير البيت
١١_ عودوهم على المشى والرياضة مش يبقى ابنك ياست الكل جنب المدرسة وتركبية توكتوك أو عربية
١٢_ اعتمدي على نفسك أي أكل ديلفيرى او اى خدمة جاهزة هتكلفك أكتر مما انتي تعمليها بنفسك قللي من الأكل الجاهز واطبخي حضرتك في البيت حتى لو أكل بسيط واليوتيوب مليان وصفات سهلة
١٣_ لما تحط ميزانية فى البيت خلى كل أفراد الأسرة يتحملوا المسؤلية دا من خلال عمل اجتماع مع كل أفراد البيت، وناقش معاهم الوضع، وفهمهم الاتى مثلا
إن يا ولاد ميزانيتنا للبيت قيمتها كذا
ومتطلباتنا كذا، ففكروا معايا ازاي نوائم ما بين ميزانيتنا ومتطلباتنا
وادرس اقتراحاتهم بشكل محترم وقول لهم اقتراحاتك فى ضوء المتاح واوصلوا لاتفاق بينكم كلكم علشان تنجح خطوات السير على ميزانية ناجحة
١٤_ نقلل اكل الشارع ومافيش حاجة اسمها ابنى مابيحبش اللى بعملة فى البيت ( الدلع ) مش على حساب صحة ولادنا
فى مكسبات طعم طبيعية ممكن احطها ع الشيبسيهات او المقرمشات باتباع عند العطارين ومتوفرة وموفرة
١٥_ استخدام الايفون او التابلت او التيلفون الاندرويد يكون للدراسة وفقط فتح فيديوهات ومشاهدة كارتون والعاب وتيوبر وبلوجر فى غير الدراسة هيكون مضيعة للوقت والباقة وتلاقي ابنك مشتت وعصبى ومش مركز وهيسبب ليك عصبية وعلى ايه الطيب احسن
