مصر تتفوق على السعودية في سوق التمور الآسيوي.. وتنتزع صدارة التوريد لعدة دول

مصر سبقت السعودية في سوق التمور الآسيوي.. وبقت أكبر مورد للتمور لأكبر سوقين في جنوب شرق آسيا.

الكلام مش مجرد منافسة بين الدول المنتجة للتمور، دي أرقام صادرات بتكشف عن توسع حضور المنتج المصري في أسواق عالمية مهمة.

لمشاهدة الفيديو من هنا 

خلال الموسم التسويقي 2025/2026، مصر صدّرت 23 ألفًا و900 طن من التمور إلى إندونيسيا وماليزيا، وهما أكبر سوقين للتمور في منطقة جنوب شرق آسيا.

والنتيجة؟ التمور المصرية استحوذت على 33% من إجمالي واردات السوقين، وحافظت مصر على المركز الأول بين الموردين، متجاوزة السعودية، صاحبة المركز الثاني، بنسبة 44% في حجم الشحنات.

وده معناه إن مصر مش بس بتنافس في سوق التمور العالمي، لكنها كمان بتقدر تحافظ على موقع متقدم في أسواق بتستورد كميات ضخمة؛ فإندونيسيا وماليزيا لوحدهما بيمثلوا الجزء الأكبر من الطلب على التمور في المنطقة.

والتوسع المصري مش واقف عند البلدين دول؛ فالصادرات وصلت كمان إلى تايلاند بنحو 400 طن، وسنغافورة بـ350 طنًا، وفيتنام بـ130 طنًا، بالإضافة إلى أسواق تانية في جنوب شرق آسيا.

واللافت إن المنافسة مبقتش قائمة على التمور التقليدية بس؛ المصدرون المصريون بيتجهوا لأصناف أعلى قيمة زي المجدول والبرحي، إلى جانب الأصناف المحلية المعروفة زي السيوي والسكوتي والملكابي.

ومصر عندها قاعدة إنتاج ضخمة بتدعم التحرك ده؛ فهي أكبر منتج للتمور عالميًا بإنتاج بيتجاوز مليوني طن، وبتملك ثروة من النخيل بتزيد على 22 مليون نخلة.

وفي عام 2025، وصلت قيمة صادرات التمور المصرية إلى 147 مليون دولار.

من إندونيسيا وماليزيا لأسواق آسيوية تانية.. التمور المصرية بتوسع وجودها، وبتثبت إن المنافسة على الأسواق العالمية مش بالإنتاج الكبير بس، لكن كمان بالقدرة على التصدير وتقديم أصناف تناسب أذواق وأسعار مختلفة.