11.5 مليار دولار من خير أرض مصر.. 7 آلاف مزرعة تفتح أبواب 160 سوقًا للصادرات الزراعية
11.5 مليار دولار دخلوا مصر من خير أرضها.. الصادرات الزراعية المصرية بتسجل رقم ضخم، وبتفتح لنفسها أبواب 160 سوقًا حول العالم.
الرقم ده وراه منظومة كاملة بتشتغل من المزرعة لحد وصول المنتج للمستهلك في الخارج.. البداية من تأهيل أكتر من 7 آلاف مزرعة ومحطة ومركز تعبئة، وتكويد 11 محصولًا للتصدير، على مساحة وصلت لنحو 280 ألف فدان.
لمشاهدة الفيديو من هنا
يعني كل خطوة في رحلة المحصول بقت خاضعة لمنظومة تتبع ورقابة، علشان المنتج المصري يقدر يلتزم باشتراطات الأسواق العالمية، خصوصًا الأسواق اللي بتفرض معايير دقيقة جدًا للجودة وسلامة الغذاء.
والنتيجة إن المنتجات الزراعية المصرية بقت موجودة في 160 سوقًا حول العالم، مع استمرار التحرك لفتح أسواق جديدة، خصوصًا في أفريقيا والأمريكتين.
لكن الأهم مش عدد الأسواق بس.. قيمة الصادرات الزراعية الطازجة والمصنعة وصلت إلى نحو 11.5 مليار دولار خلال 2025، منها 4.96 مليار دولار صادرات طازجة، و6.8 مليار دولار صادرات مصنعة.
أما حجم الصادرات فوصل إلى 9.5 مليون طن خلال 2026، وده بيعكس اتساع القدرة الإنتاجية والتصديرية للقطاع الزراعي.
ومصر كمان مش بتنافس بالكميات فقط؛ لأنها احتلت المركز الأول عالميًا في تصدير الموالح والفراولة المجمدة، والمركز الثالث في تصدير الفراولة الطازجة، والسادس عالميًا في إنتاج الخضروات بإنتاج وصل إلى 24 مليون طن.
والتحول المهم هنا هو التوسع في التصنيع الزراعي، بدل الاكتفاء بتصدير المحاصيل في صورتها الخام، لأن المنتج المصنع بيضيف قيمة أكبر ويفتح فرصًا لتحقيق عائد تصديري أعلى.
من 7 آلاف مزرعة ومحطة ومركز تعبئة، إلى 160 سوقًا حول العالم.. الزراعة المصرية بقت مصدرًا مهمًا للعملة الصعبة، ووراء الرقم الكبير ده رحلة طويلة من الإنتاج والتكويد والتصنيع والتصدير.
