الرقابة المالية تشدد قواعد التمويل.. إزاي تحمي نفسك من القروض والاحتيال؟

لو بتفكر تاخد تمويل بالتقسيط أو تمويل لمشروعك، فيه إجراءات جديدة من الرقابة المالية هدفها تحميك من الاحتيال، وتمنعك تاخد قروض أكتر من قدرتك على السداد.

القرارات دي بتيجي مع الطفرة الكبيرة في التمويل الاستهلاكي، اللي قفز من 8 مليارات جنيه إلى 96 مليار جنيه خلال 5 سنين، وعدد المستفيدين وصل لحوالي 12 مليون مواطن.

لمشاهدة الفيديو من هنا 

أول إجراء هو الربط اللحظي بين شركات التمويل و«آي سكور»، لمتابعة التمويلات والموافقات والسداد، ومنع حصول العميل على تمويلات متعددة تفوق قدرته. كمان هيكون فيه كود تحقق OTP على موبايل العميل، للتأكد من هويته ومنع انتحال الشخصية. 

والجديد كمان التقييم السلوكي، اللي بيساعد الشركات تدرس قدرة العميل على السداد، خصوصًا اللي معندهمش تاريخ ائتماني كافي. ولو طلب التمويل اترفض، من حقك تعرف السبب، وتطلب تحديث بياناتك أو تتظلم لو فيها معلومات غير دقيقة.
الهدف مش منع التمويل، لكن تنظيمه وحماية حقوقك.