إغلاق نهائي لـ530 ألف خط محمول في مصر خلال 45 يومًا.. ما السبب؟
530 ألف خط محمول اتقفلوا نهائيًا في مصر خلال 45 يوم بس.. والعدد ده مش مجرد مراجعة عادية لخطوط المحمول، لكنه جزء من حملة واسعة لإعادة ضبط سوق الاتصالات وإنهاء أزمة الخطوط المسجلة بأسماء مواطنين من غير علمهم.
لمشاهدة الفيديو من هنا
القصة بدأت في أغسطس 2026، لما مواطنين اكتشفوا إن فيه أرقام محمول متسجلة ببياناتهم الشخصية رغم إنهم لا اشتروها ولا استخدموها، وده فتح باب كبير من التساؤلات عن إزاي الخطوط دي اتفعلت من الأساس من غير موافقة أصحاب البيانات.
وعلى خلفية الشكاوى دي، الجهاز القومي لتنظيم الاتصالات أحال شركات المحمول الأربع العاملة في مصر للنيابة العامة للتحقيق في الوقائع، وبدأ في فرض إجراءات جديدة لتشديد الرقابة على تسجيل وتفعيل الشرائح.
ومن أبرز الإجراءات إلزام شركات المحمول بإرسال رسائل نصية لحائزي الخطوط القديمة، ومطالبتهم بالتوجه للفروع لإثبات هويتهم وإبرام عقود جديدة باسم المستخدم الفعلي للخط، مع إلغاء أي شريحة نهائيًا في حالة عدم استكمال الإجراءات خلال المهلة المحددة.
والحصيلة خلال 45 يومًا كانت إغلاق 530 ألف شريحة، ليتراجع إجمالي عدد خطوط المحمول في مصر إلى 128.1 مليون خط، بدلًا من أكثر من 128.6 مليون خط قبل بدء الإجراءات.
والجهاز كمان بيتجه لتوسيع استخدام التحقق البيومتري، يعني وسائل التأكد من هوية المستخدم بشكل أكثر أمانًا، من خلال التطبيقات الإلكترونية لشركات المحمول، علشان المواطن يقدر يعرف الخطوط المسجلة باسمه ويتصرف لو اكتشف رقم مش تابع له.
والأهم إن الجهاز حذر شركات الاتصالات من مخالفة القواعد الجديدة، مؤكدًا إن العقوبات ممكن توصل لوقف بيع وتفعيل خطوط جديدة للشركة المخالفة، بجانب الإحالة للنيابة العامة.
يعني اللي بيحصل حاليًا مش مجرد إلغاء مئات الآلاف من الشرائح، لكنه إعادة تنظيم لمنظومة تسجيل خطوط المحمول بالكامل، علشان كل رقم يبقى مرتبط بالشخص اللي بيملكه ويستخدمه فعلًا.
