وداعًا للاستيراد.. مصر تتحرك لتوطين صناعة بطاريات الليثيوم بالتكنولوجيا الروسية

وداعًا لاستيراد بطاريات الليثيوم من الخارج؟ مصر بتتحرك لنقل تكنولوجيا روسية متطورة وتوطين صناعة البطاريات محليًا، في خطوة ممكن تغير خريطة صناعة الطاقة في مصر.

الحكاية بدأت بزيارة وزير الكهرباء محمود عصمت لمصنع «رينيرا» الروسي، التابع لمؤسسة «روسآتوم»، واللي بيعتبر واحد من المصانع المتطورة في إنتاج خلايا الليثيوم أيون وبطاريات تخزين الطاقة.

الوزير اطلع على خطوط الإنتاج اللي بتشتغل بنسبة أتمتة وصلت لـ95%، والمصنع قدرته الإنتاجية بتوصل لـ18 مليون خلية بطارية، بما يعادل حوالي 50 ألف بطارية سنويًا.

لكن الأهم مش مجرد نقل بطاريات من روسيا لمصر.. الهدف هو نقل التكنولوجيا نفسها وتوطين الصناعة، بالاستفادة من المواد الخام المتاحة في مصر، والتعاون مع القطاع الخاص.

والبطاريات دي مش للسيارات الكهربائية بس.. دي كمان بتستخدم في الأتوبيسات والترام والسفن الكهربائية، والأهم في تخزين الكهرباء المنتجة من الطاقة الشمسية والرياح، وكمان توفير الطاقة الاحتياطية للمستشفيات ومراكز البيانات والمصانع الكبرى.

ليه مصر مهتمة بالصناعة دي تحديدًا؟ لأن التوسع في الطاقة الشمسية وطاقة الرياح محتاج أنظمة تخزن الكهرباء لاستخدامها وقت الحاجة، وده بيساعد على استقرار الشبكة الكهربائية وتقليل الاعتماد على التكنولوجيا المستوردة.

ومع استمرار المباحثات المصرية الروسية، بتستهدف الدولة تحويل مصر لمركز إقليمي لصناعة مكونات ومهمات الطاقة المتجددة.

فهل نشوف قريب بطاريات ليثيوم بتكنولوجيا روسية وصناعة مصرية تنافس في الأسواق الإقليمية؟