5 تريليونات جنيه للكهرباء في مصر.. والطاقة المتجددة تستحوذ على النصيب الأكبر

5 تريليونات جنيه اتضخوا في قطاع الكهرباء في مصر.. رقم ضخم، لكن المفاجأة مش في حجم الاستثمارات بس، المفاجأة في توزيع الفلوس، وخطة مصر لزيادة الاعتماد على الطاقة المتجددة خلال السنين الجاية.

وزير الكهرباء محمود عصمت كشف إن إجمالي الاستثمارات في إنتاج ونقل وتوزيع الكهرباء وصل لحوالي 5 تريليونات جنيه منذ عام 2014.

لكن الفلوس دي راحت فين؟
حوالي 2.7 تريليون جنيه لإنتاج الكهرباء من المصادر الحرارية والمتجددة، و1.6 تريليون جنيه لمشروع محطة الضبعة النووية، و646 مليار جنيه لتطوير شبكات نقل الكهرباء، و110 مليارات جنيه لتطوير شبكات التوزيع.

وفي الوقت نفسه، مصر بتسرّع خطتها للتوسع في الطاقة المتجددة، وبتستهدف إن مصادر الطاقة دي تمثل 45% من مزيج الكهرباء بحلول عام 2028، بدلًا من المستهدف السابق في 2030.

حاليًا، القدرات المتجددة المتصلة بالشبكة وصلت إلى 10.5 جيجاوات، ومعاها 1.1 جيجاوات من قدرات تخزين الطاقة بالبطاريات، بإجمالي مساهمة يصل إلى 18% من مزيج الطاقة.

والخطة الجديدة بتشمل إضافة آلاف الميجاوات من طاقة الرياح والطاقة الشمسية، مع التوسع في بطاريات التخزين، علشان الشبكة تقدر تستوعب الطاقة النظيفة وتتعامل مع اختلاف إنتاجها على مدار اليوم.

والهدف مش بس زيادة الكهرباء، لكن كمان تقليل استهلاك الوقود التقليدي، وتخفيف الضغط على العملة الأجنبية، وخفض الانبعاثات الكربونية.

لكن السؤال الأهم: هل الاستثمارات الضخمة دي هتقدر تقلل تكلفة إنتاج الكهرباء وتضمن استقرار التيار، وفي نفس الوقت تزود الاعتماد على الطاقة النظيفة؟