استثمارات تتجاوز مليار دولار لإضافة 400 محطة وقود في مصر.. ما التفاصيل؟
شركة أدنوك للتوزيع الإماراتية بتخطط لتوسعات كبيرة في السوق المصري، باستثمارات ممكن تتجاوز مليار دولار.
الخطة المقترحة بتشمل إضافة 400 محطة وقود جديدة على مرحلتين، كل مرحلة 200 محطة، بجانب التوسع في إنتاج وبيع زيوت السيارات والمحركات.
وحاليًا أدنوك للتوزيع بتدير 245 محطة وقود في مصر، ولو الخطة اتنفذت بالكامل، شبكة محطاتها هتزيد لأكتر من الضعف.
والشركة بتدرس أكتر من طريقة لتنفيذ التوسعات، منها إنشاء محطات بشكل مستقل لأول مرة، أو الدخول في شراكات مع الهيئة المصرية العامة للبترول، أو تطوير مواقع قائمة، وكمان تنفيذ مشروعات بنظام التأجير.
ومش بس محطات الوقود، الشركة بتجهز لاستثمار 50 مليون دولار للتوسع في تموين الطائرات بالوقود في مطاري سفنكس والغردقة.
ومن المقرر بدء تموين الطائرات في سفنكس خلال أكتوبر، مع استكمال الترتيبات لبدء النشاط في الغردقة قبل نهاية السنة.
