قبل ما تقدم في حج القرعة.. مين ينفع يبقى مرافقك وإمتى تقدر تتنازل عن الفرصة؟

لو ناوي تقدم في حج القرعة 2027، لازم تعرف شروط المرافق والتنازل عن فرصة الحج قبل ما تقدم.

وزارة الداخلية حددت أن المتقدم يقدر يكون معاه مرافق، بشرط وجود صلة قرابة لحد الدرجة الرابعة، مع تقديم المستندات اللي تثبت القرابة بعد الفوز.

وبالنسبة للسن، المرافق الوجوبي لازم يكون عنده 18 سنة على الأقل، أما المرافق غير الوجوبي فمسموح من سن 12 سنة.

طب لو حد كسب وعايز يتنازل؟.. فرصة الحج مش بتتورث، لكن التنازل مسموح في حالات محددة، زي التنازل بين الزوجين أو بين الأبناء والوالدين، بشرط استيفاء الضوابط.

كمان المتنازل إليه لازم يكون لائق صحيًا، وما يكونش أدى فريضة الحج قبل كده، وإجراءات التنازل لازم تتم خلال 48 ساعة من انتهاء مهلة سداد التكاليف.

وفيه أمراض وحالات صحية تمنع السفر للحج، منها الفشل الكلوي، وتليف الرئة، وأمراض القلب المتقدمة، والزهايمر والحمل الخطر.