95 % من البذور مستوردة.. مصر بتحاول تفك "عقدة" تقاوي الطماطم

تصدق إن مصر، رغم إنها من أكبر منتجي الطماطم في العالم، بتستورد حوالي 95% من بذور الخضر من الخارج؟

الموضوع مش مجرد بذور بتتزرع وخلاص.. التقاوي عنصر أساسي في تحديد إنتاجية المحصول وجودته، وكمان قدرته على مقاومة الأمراض وتحمل الحرارة والملوحة والجفاف.

وعشان كده مصر بدأت تتحرك لتقليل الاعتماد على الاستيراد، خصوصًا في تقاوي الطماطم، من خلال استنباط هجن وأصناف مصرية تكون مناسبة للظروف المناخية والزراعية في مصر.

والنتيجة؟
مركز البحوث الزراعية نجح في استنباط وتسجيل 8 أصناف وهجن مصرية جديدة من الطماطم، تتميز بإنتاجية عالية وقدرة أكبر على مقاومة الأمراض والتقلبات الجوية.

وكمان فيه توسع في إنتاج هجين الطماطم المحلي F25 في منطقة المغرة، ضمن توجه لإنتاج تقاوي مصرية بنسبة 100%.

وده مهم جدًا لأن مصر بتنتج سنويًا حوالي 6.5 لـ7.1 مليون طن من الطماطم، وبتزرع المحصول على مساحة بتقرب من 382 ألف فدان.

يعني ببساطة.. مصر مش بس عايزة تنتج الطماطم، لكنها عايزة كمان تمتلك التقاوي اللي بتنتج بيها الطماطم.

فهل تنجح مصر في تقليل الـ95% المستوردة، وتوصل للاكتفاء الذاتي من تقاوي الخضر؟