السلع الأساسية في أمان؟.. اعرف إزاي مصر بتأمن مخزون السكر والزيت والأرز
السكر والزيت والأرز والمكرونة.. هل مصر عندها مخزون يكفي لو حصلت أي أزمة؟ الدولة بتشتغل على تأمين مخزون استراتيجي من السلع الأساسية، مع تنويع مصادر الشراء والاستيراد، عشان أي تغيرات عالمية أو إقليمية ما تأثرش بشكل مفاجئ على توافر المنتجات في الأسواق.
وحاليًا، المخزون الاستراتيجي من معظم السلع الأساسية بيغطي في المتوسط حوالي 6 شهور، وفي سلع تانية بيصل المخزون فيها لـ 12 شهر.
وكمان الحكومة بتستمر في ضخ السلع من خلال المجمعات الاستهلاكية وبقالي التموين ومنافذ "جمعيتي"، مع تشديد الرقابة لمنع الاحتكار وضمان توافر السلع بالأسعار المعلنة.
أما السكر تحديدًا، فأعلنت الحكومة مؤخرًا إن المخزون الاستراتيجي منه يكفي لعام كامل.
يعني الخطة مش مجرد تخزين سلع.. لكن تأمين مصادر متعددة، ومتابعة المخزون، وضخ مستمر في الأسواق.
السؤال الأهم.. هل المخزون ده يقدر يحمي السوق من أي أزمة جديدة؟
