نزل 60 جنيه وتوقعات بمزيد من الهبوط.. انهيار مفاجيء للدهب
الذهب نزل 60 جنيه مرة واحدة.. لكن هل دي فرصة حقيقية للشراء ولا فيه مفاجأة ممكن تخلي المشتري يخسر؟ وليه الذهب المصري بيتباع بأعلى من قيمته الحقيقية بأكتر من 100 جنيه في الجرام؟
أسعار الذهب في مصر اتعرضت لضربة جديدة خلال تعاملات الخميس.. وعيار 21 اللي بيعتبر المؤشر الأهم لحركة السوق نزل لـ6040 جنيه بعد خسارة 60 جنيه مرة واحدة.
والتراجع ده جه بالتزامن مع هبوط الأونصة عالمياً لـ3937 دولار وكسور بعد ما خسرت أكتر من 50 دولار..
وبحسب بيانات منصة آي صاغة.. عيار 24 سجل 6903 جنيهات.. وعيار 18 وصل لـ5177 جنيه.. والجنيه الذهب سجل حوالي 48 ألف و320 جنيه..
لكن إيه اللي ضغط على الذهب بالشكل ده؟
السبب الأساسي جاي من أمريكا.. بيانات التضخم طلعت أعلى من توقعات الأسواق.. وده زود المخاوف من استمرار الفيدرالي الأمريكي في تشديد السياسة النقدية ورفع الفايدة أو الإبقاء عليها مرتفعة لفترة أطول.
وده دعم الدولار وخلى المستثمرين يتجهوا بعيد عن الذهب.. وبالتالي الأونصة خسرت جزء من قيمتها.
واللافت إن الذهب في مصر نزل رغم الارتفاع الطفيف للدولار قدام الجنيه.. لأن صعود الدولار ماكانش كفاية يعوض الخسارة الكبيرة في السعر العالمي.
لكن المفاجأة الأكبر مش في التراجع نفسه.. إنما في الفجوة السعرية بين الذهب المحلي وقيمته الحقيقية.
منصة آي صاغة رصدت ارتفاع الفجوة بين سعر عيار 21 في مصر وقيمته النظرية من 86 جنيه لأكتر من 102 جنيه.
وسعيد إمبابي المدير التنفيذي للمنصة وضح إن المشتري في الحالة دي مش بيدفع تمن الذهب بس.. لكنه بيتحمل زيادة فوق قيمته المحسوبة حسب السعر العالمي وسعر الدولار.
وده معناه إن المستهلك ممكن يتعرض لخسارة إضافية لو الفجوة دي اتقلصت بعد كده.. حتى لو السعر العالمي فضل ثابت ومحققش أي هبوط جديد.
بمعنى أبسط.. مش كل نزول في سعر الذهب معناه إن الشراء بقى فرصة.. لازم تبص كمان على الفجوة بين السعر المحلي والقيمة العادلة للجرام.
