بصمتك هتحسمها.. مصر تواجه تسريب شرائح المحمول بتقنية جديدة

لاقيت خط محمول باسمك من غير ما تعرف؟.. الجهاز القومي لتنظيم الاتصالات داخل على خطوة جديدة ممكن تغير طريقة تسجيل واستبدال شرائح المحمول!

الخطوة ببساطة هي الاعتماد بشكل أكبر على التحقق البيومتري.. يعني بصمة الوجه وبصمة الإصبع للتأكد إن الشخص اللي بيطلب الخط أو بيستبدل الشريحة هو فعلًا صاحب البيانات.

وده معناه إن استخدام بيانات شخص تاني لتسجيل شريحة محمول هيبقى أصعب، لأن العملية مش هتعتمد على البيانات أو المستندات بس.. لكن كمان على التحقق من هوية الشخص نفسه.

والأهم إن فيه ربط إلكتروني بين أنظمة شركات المحمول وقواعد البيانات الرسمية، علشان يتم التأكد من بيانات العميل أثناء تسجيل الخط أو استبدال الشريحة.

ولو قلقان يكون فيه رقم محمول متسجل باسمك من غير علمك، تقدر تراجع الأرقام المسجلة باسمك من خلال تطبيق My NTRA.

ولو لقيت رقم مش بتاعك، متتجاهلش الموضوع.. احتفظ ببيانات الرقم وقدم شكوى للجهاز القومي لتنظيم الاتصالات علشان يتم فحص طريقة تسجيله.

يعني زمن تسجيل شريحة ببيانات شخص تاني بيتحاصر خطوة بخطوة.. والمرة دي، بصمتك هي اللي هتحسم مين صاحب الخط.