سيارات بأقل من سعر السوق.. تفاصيل وشروط مزاد وزارة المالية الجديد

لو نفسك تشتري عربية بسعر أقل من السوق.. الفرصة دي ممكن تهمك!. وزارة المالية أعلنت عن مزاد علني لبيع سيارات ومركبات النيابات، يوم 16 أغسطس 2026، وبيضم موديلات وماركات مختلفة، منها مرسيدس وتويوتا وهيونداي وكيا ونيسان وبي إم دبليو، بالإضافة لعربيات نقل وميكروباصات وموتوسيكلات وتروسيكلات.

المزاد هيتعمل في قاعة نادي الجيزة الرياضي بشارع البحر الأعظم، الساعة 12 ظهرًا.

طيب إيه شروط الدخول؟

أول حاجة لازم تشتري كراسة الشروط بـ400 جنيه من مقر الهيئة العامة للخدمات الحكومية بأبراج وزارة المالية.

وكمان تدفع 50 ألف جنيه تأمين دخول المزاد.

ولو المزاد رسا عليك.. هتدفع 30% من قيمة العربية فورًا، وباقي المبلغ خلال 15 يوم من تاريخ جلسة المزاد.

والأهم.. المعاينة متاحة قبل المزاد، والمعاينة هي أساس البيع، يعني لازم تشوف العربية كويس قبل ما تزايد.

فلو بتدور على عربية مستعملة بسعر منافس.. جهز نفسك، واقرأ كراسة الشروط كويس قبل ما تدخل المزاد.